Azərbaycan, Bakı, 21 may/ Trend , müxbir İ.Xəlilova/ Azərbaycanın İqtisadi İnkişaf Nazirliyi Balaxanıkdakı məişət tullantıları poliqonunda qaz alınması layihəsi çərçivəsində Yaponiyanın Mitsubishi korporasiyası ilə əməkdaşlığı davam etdirməkdən imtina edib.
Nazirliyin İnvestisiya Siyasəti şöbəsinin rəisi Ələsgər Ələkbərovun sözlərinə görə, hökumət Balaxanıdakı məişət tullantıları poliqonunun örtülməsini öz vəsaitləri hesabına, məişət tullantılarının yandırılması zavodunun tikintisi layihəsi çərçivəsində həyata keçirmək niyyətindədir.
Əvvəllər bu tədbiləri qismən layihəyə daxil etmək nəzərdə tutulub. Lakin İqtisadi İnkişaf Nazirliyi sonda zibilyandıran zavodun tikintisi kimi, poliqonun örtülməsini mərhələli şəkildə, öz daxili vəsaitləri hesabına həyata keçirmək qərarına gəlib.
"Mitsubishi ilə imzalanan memorandum şirkətin bu sahədə araşdırmalar aparmasını nəzərdə tutub, lakin onu layihənin reallaşdırılmasında iştiraka məcbur etməyib", - şöbə rəhbəri qeyd edib.
Mitsubishi ilk dəfə olaraq təmiz inkişaf mexanizmindən istifadə edərək, öz vəsaitləri hesabına, mövcud məişət tullantıları poliqonlarının sağlamlaşdırılmasını təklif edib. Layihənin reallaşdırılması nəticəsində, emissiyanın ixtisarı və onun inkişaf etmiş ölkələrdə reallaşdırılması üzrə sertifikatın alınması nəzərdə tutulur. Kioto protokoluna əsasən, inkişaf etmiş ölkələr digər ölkələrdə qaz emissiyasının ixtisarı üçün öz üzərlərinə götürdükləri kvotaların müəyyən hissəsini ödəyə bilərlər. Ələkbərovun sözlərinə görə, hazırda Ekologiya və Təbii Sərvətlər Nazirliyi BMT-dən metan qazı tullantıları üzrə kvotalarının satışına icazə almaq üçün işləri davam etdirir.
"İstənilən halda, kvotaların satışı layihənin sonuncu mərhələsində nəzərdə tutulur. Bununla əlaqədar, hazırda əsas diqqət zavodun tikintisi üçün podratçı şirkətin seçilməsinə yönəldilir", - Ələkbərov bildirib.
Onun sözlərinə görə, mayın sonunadək tenderin qalibi ilə müqavilənin şərtlərinin müzakirəsini başa çatdırmaq planlaşdırılır. Podrat şirkətinin müəyyən edilməsi üzrə tenderdə dörd şirkət iştirak edib - Fransanın CNİM, Avstriyanın EVN, Almaniyanın Enconi və Rusiyanın "Moskekostroy/Mosspeçstroy" şirkəti.
Zavodun Balaxanıda, poliqon ərazisi yaxınlığında tikilməsi nəzərdə tutulub. Onun illik gücü 500 min ton təşkil edəcək. Podratçı üçün əsas şərt müəssisənin ən yaxşı texnologiya üzrə tikilməsi və enerjinin əldə edilməsidir.
Rəsmi məlumatlara görə, Bakı və onun ətrafında hər il 1 mln. ton məişət tullantısı toplanır.
Poliqonlarda insan sağlamlığı üçün zərərli olan metan qazı formalaşır vəətraf mühitə mənfi təsir göstərir. Yaxınlıqda yerləşən yaşayış məntəqələrinin əhalisinə təhlükə törətdiyini nəzərə alaraq, bu tullantıların təmizlənməsi zəruri hesab edilir.
Bu gün Bakı ətrafında üç məişət tullantıları poliqonu var.
Müəlliflə əlaqə saxlamaq üçün elektron ünvan: [email protected]
