Azərbaycan, Bakı, 30 may/ Trend , müxbir İ.Xəlilova/ Daha iki beynəlxalq maliyyə institutu - Beynəlxalq Maliyyə Korporasiyası və Alman inkişaf bankı KfW "Aqrar-kredit" bank olmayan kredit təşkilatının bazasında yaradılması planlaşdırılan kənd təsərrüfatı bankında iştirakda maraqlı olduqlarını bildiriblər. Bu barədə cümə günü Azərbaycan Milli Bankının kredit təşkilatlarının fəaliyyətinə nəzarət üzrə Departamentinin direktoru Rəşad Orucov məlumat verib. İndiyədək danışıqlar yalnız Avropa Yenidənqurma və İnkişaf Bankı (AYİB) ilə aparılıb. AYİB kənd təsərrüfatı bankında səhmlərin 25 faizinə iddia edib.
AYİB KfW ilə birlikdə bankların səhmdarları sırasına daxil olmaq təcrübəsinə malikdir.
Orucovun sözlərinə görə, Milli Bank hələ ki, bu maliyyə institutlarının təklifləri ilə tanış olur və bu institutların hər birinin iştirak payını hələ müəyyən etməyib. "Aqrar-kredit"in statusunun dəyişdirilməsi üzrə iş hələ davam edir. Lakin onun əsas səhmdarı - Maliyyə Nazirliyi hələ tam bank lisenziyasının verilməsi xahişi ilə müraciət etməyib.
Milli Bank ərzaq təhlükəsizliyi üzrə hazırlanan proqram çərçivəsində, ölkə hökumətinə kənd təsərrüfatı inkişafının maliyyələşdirilməsinə dair təkliflər təqdim edib. Təkliflər suvarma, fermerlərin irriqasiya fəaliyyətindən başlayaraq, satış şəbəkələrinin yaradılmasınadək, aqrar istehsalın bütün silsiləsini maliyyələşdirəcək kənd təsərrüfatı institutunun yaradılmasını nəzərdə tutur.
Orucov hesab edir ki, aqrar bankın mövcud infrastrukturun bazasında yaradılması məqsədəuyğundur. Beynəlxalq təşkilatlar da bunu dəstəkləyirlər.
Hazırda "Aqrar-Kredit" kredit təşkilatı məhdud lisenziya əsasında fəaliyyət göstərir.
Kredit təşkilatının kapitalı 2007-ci il dövlət büdcəsinin hesabına dövlət tərəfindən 6,3 mln. manat ödənildikdən sonra, hazırda 18,5 mln. manat səviyyəsində formalaşdırlıb. Onun aktivləri 25-mln. manata, kredit portfeli isə, 16 mln. manata çatıb.
Hökumət ölkənin aqrar sektorunun inkişafında maraqlıdır. Aqrar sektorun maliyyə ehtiyatlarına olan tələbatı $1,2-1,3 mlrd. təşkil və bununla əlaqədar, kənd təsərrüfatı bankının tezliklə yaradılması lazımdır.
"Aqrar-kredit"in əsas səhmdarı kredit təşkilatında 99,9 faiz səhmə malik Azərbaycanın Maliyyə Nazirliyidir. Qalan hissəsi isə, "Azərsığorta" dövlət sığorta şirkəti və "Meliorasiya və su təsərrüfatı" ASC arasında bərabər şəkildə paylanıb.
Müəlliflə əlaqə saxlamaq üçün elektron ünvan: [email protected]
