Azərbaycan, Bakı, 06 iyun/ Trend , müxbir İ.Xəlilova/ Azərbaycan-Aİ əməkdaşlığı üzrə Komitənin IX iclasının iyunun 20-də, Brüsseldə keçirilməsi planlaşdırılıb. Bu barədə cümə günü Azərbaycanın İqtisadi İnkişaf Nazirliyinin İnvestisiya siyasəti şöbəsinin rəsisi Əsgər Ələkbərov məlumat verib. Komitədə ölkədən olan həmsədrlər xarici işlər nazirinin müavini Mahmud Məmmədquliyev və iqtisadi inkişaf nazirinin müavini Mikayıl Cabbarovdur.
İclasın gündəliyində həm siyasi, həm də iqtisadi, infrastruktur xarakterli məsələlər daxil edilib. Avropa Qonşuluq Siyasəti (ENP) çərçivəsində məsələlərin, ENP çərçivəsində 2006-cı ilin noyabrında Brüsseldə imzalanmış fəaliyyət planının reallaşdırılmasının nəzərdən keçirilməsi, Aİ-nin ticarət, iqtisadiyyat və hüquq məsələləri üzrə Alt komitəsinin VII iclasının protokolunun təsdiqlənməsi, həmçinin, nəqliyyat və energetika üzrə altkomitənin III iclasının keçirilməsi planlaşdırılır.
Müzakirələr Qarabağ probleminə də toxunacaq. Konkret olaraq, Aİ-nin bu münaqişənin həllində ATƏT-in Minsk Qrupunun səylərinin dəstəklənməsinə yönəlmiş hərəkətləri nəzərdən keçiriləcək.
Hazırda Azərbaycanın Aİ ilə əməkdaşlığı ENP çərçivəsində həyata keçirilir. 2007-2010-ci illərdə ölkə üçün onun büdcəsi 92 mln. avro həcmində nəzərdə tutulub.
Azərbaycan üçün ENP fəaliyyət planında prioritet istiqamətlər kimi, ölkədə demokratiyanın gücləndirilməsi, iş və investisiya iqliminin yaxşılaşdırılması, davamlı iqtisadi inkişafın dəstəklənməsi, iqtisadi sahədə və idarəetmə təcrübəsində qanunvericiliyin uyğunlaşdırılması, energetika və nəqliyyat, regional əməkdaşlıq, həmçinin, sərhədyanı idarəetmə və s. sahəsində Aİ və AR arasında əməkdaşlığın gücləndirilməsi daxildir. Tədbirlər üç əsas prioritet sahəyə bölünüb - idarəetmə sisteminin təkmilləşdirilməsi; iqtisadi və sosial islahatlar; energetika, nəqliyyat, ekologiya və infrastruktur.
Müəlliflə əlaqə saxlamaq üçün elektron ünvan: [email protected]
