Azərbaycan, Bakı, 10 iyun / Trend müxbir İ.Xəlilova/Azərbaycanın kiçik və orta şirkətləri Bakıda Avropa avadanlığının yarı qiymətinə almaq imkanı əldə edəcəklər. Bu haqda Azərbaycanda İnvestisiya və İxracın Təşviqi Fondunun ("AZPROMO") prezidenti Emil Məcidov bildirib. Bu imkan iyunun 10-11-də Bakıda keçiriləcək "RE-INVEST Caspian" sərgisində yaranacaq. "RE-INVEST Caspian" - Xəzəryanı və Qafqaz regionu üçün işlənmiş maşın və avadanlıq sərgisidir.
"Azərbaycan sözügedən sərginin keçirilməsi təşəbbüsünü hələ iki il əvvəl Azərbaycan şirkətlərinin Qərb istehsalı olan avadanlığına böyük tələbatını nəzərə alaraq, alman tərəfi təklif etmişdi, - deyə Məcidov qeyd edib. Bu, alman tərəfinin kommersiya maraqlarıdır və biz bu təşəbbüsü dəstəkləyirik, çünki bizim kiçik və orta biznes hər zaman axtarışdadır. Azərbaycan bizesmenləri ölkəni tərk etmədən lazımı avadanlığı əldə edə bilər. Artıq bu gün kiçik sazişlər bağlamağa başlayıblar".
Sərgi "AZPROMO", Almaniyanın Texniki Yardım Cəmiyyəti və Almaniyanın "Corporate Solution" Konsaltinq Şirkətinin dəstəyi ilə keçirilir. Sərgidə ona yaxın ölkənin qida, ağac emalı, mebel, metal emalı, toxuculuq, yüngül sənaye, tikinti və kənd təsərrüfatı maşınları üzrə işlənmiş avadanlıqları təqdim olunub.
Sərgi region sahibkarları və işlənmiş avadanlıq üzrə ixtisaslaşmış satıcılar arasında bir- başa əlaqələri yaxşılaşdırmağı nəzərdə tutur. 50-yə yaxın sərgi iştirakçısının daxil olduğu alman nümayəndə heyətinə "Corporate Solution Konsalting"-ın rəhbəri Tomas Prays başçılıq edir.
Müəlliflə əlaqə saxlamaq üçün elektron ünvan: [email protected]
