Azərbaycan, Bakı, 19 iyun / Trend Dövlət Statistika Komitəsinin məlumatına görə, 2008-ci ilin yanvar-may aylarında Azərbaycanın nəqliyyat sektoru ilə 72,4 mln. ton müxtəlif növlü yük daşınıb ki, bu da 2007-ci ilin yanvar-may göstəricisindən 13,8 faiz çoxdur.
Daşınan yüklərin ümumi həcmindən 68 faizi özəl sektorun payına düşüb. Yanvar-may ərzində yüklərin ümumi həcmindən 43,5 faizi avtomobil nəqliyyatı, 34,1 faizi boru kəmərləri (O cümlədən 20,9 faizi Bakı - Tbilisi - Ceyhan üzrə və 1,7 faizi Cənubi Qafqaz qaz kəməri ilə), 15,9 faizi dəmir yolu nəqliyyatı və 6,5 faizi dəniz ilə daşnıb.
Yanvar-mayda sərnişin nəqliyyatı ilə 481,8 mln. nəfər daşınıb ki, bu da 2007-ci ilin yanvar-may göstəricilərindən 7,1 faiz çoxdur. Sərnişindaşımada 81,7 faiz özəl sektorun payına düşür. Sərnişinlərin əsas hissəsi avtomobil nəqliyyatı (81,8 faiz) və metro (17,6 faiz) ilə daşnıb.
Dəmir yolu nəqliyyatı ilə 11,5 mln. ton müxtəlif növlü yük daşınıb ki, bu da 2007-ci ilin yanvar-may ayının göstəricisindən 2,7 faiz azdır.
Dəniz nəqliyyatı ilə 4,7 mln. ton müxtəlif növlü yük daşınıb. Bu 2007-ciilin analoji dövr göstəricisindən 16,9 faiz çoxdur. Daşınan yüklərin ümumi həcmindən 64,2 faiz neft və neft məhsulları, qalan hissəsi - 35,8 faizi isə, quru yüklərin payına düşüb. Daşınan yüklərin bütün həcmi beynəlxalq əməliyyatların payına düşür.
Azərbaycan limanlarında emal edilən yüklərin həcmi yanvar-mayda 2,5 mln. ton təşkil edib. Bu həcm 2007-ciilin yanvar-may göstəricilərindən 22,1 faiz çoxdur.
Avtonəqliyyat vasitəsilə 31,5 mln. ton yük daşınıb ki, bu da 2007-ci ilin yanvar-may göstəricilərindən 6,4 faiz çoxdur. Sərnişindaşımanın həcmi 394,1 mln. nəfər təşkil edib (5,8 faiz artıb). Sərnişinlərin 96,6 faizi avtobus, 3,4 faizi minik avtomobilləri vasitəsilə daşınıb.
Metropoliten sərnişindaşımalarının həcmi 85 mln. nəfər olub, bu göstərici 14,9 faiz artıb.
Hava nəqliyyatı ilə sərnşindaşıma 9,4 faiz aşağı düşüb və 474,5 min nəfər təşkil edib. Sərnişindaşımanın bu növünün 6,5 faizi qeyri-hökumət sektorunun payına düşüb.
Magistral neft kəmərləri ilə 20,2 mln. ton neft nəql olunub. Nəqlin dörddə üç hissəsi Bakı-Tbilisi-Ceyhanın boru kəmərinin payına düşüb. Cari ilin yanvar-may ayları ərzində Bakıdan 15,1 mln. ton neft göndərilib. Magistral neft kəmərləri üzrə nəql olunan ümumi neftin həcmi ötən ilin analoji dövr göstəricisinə nisbətdə 29,7 faiz artıb.
Ötən ilin yanvar-may aylarında magistral qaz kəmərləri ilə 4,4 mlrd. kub metr qaz nəql olunub. Bu həcm ,2007-ci ilin yanvar-may göstəriciləri ilə müqayisədə, 74,1 faiz çoxdur. Qazın 1,9 mlrd. kub metri (Ümumi həcmin 28 faizi) Cənubi Qafqaz boru kəməri ilə nəql olunub.
Azərbaycan ərazisindən keçməklə, Avroasiya nəqliyyat dəhlizi vasitəsilə 2008-ci ilin yanvar-aprelində 15,7 mln. ton yük daşınıb ki, bu da 2007-ciilin analoji göstəricilərindən 1,3 faiz çoxdur.Bu marşrut üzrə sərnişindaşıma 61,2 mln. nəfər təşkil edib (2007-ciilin yaqvar-aprel göstəricilərindən 5,5 faiz çox). Daşınmalardan əldə olunan gəlir 85,1 mln. manat təşkil edib. Bu, 2007-ciilin analoji dövr göstəricisindən 12,5 faiz çoxdur.
