Azərbaycan, Bakı, 02 iyul / Trend , müxbir İ.Xəlilova/ "Nikoyl" İKB ASC-nin səhmdarları çərşənbə günü Bakıda keçirilən iclasda bankın gələcək inkişaf strategiyasını təsdiq ediblər.
Bank idarəçiliyi qarşısına 2008-ci ildə kredit portfelinin 74 mln. manata çatdırılması, Azərbaycan bazarına 90,1 mln. manatdan çox müddətli depozitlərin cəlb edilməsi, xarici borclanma həcminin 75 mln. dollara çatdırılması və doqquz yeni filialın açılması vəzifəsi qoyulub.
Cari ildə satış nöqtələri şəbəkələrinin inkişaf planına əsasən üç filial Bakıda, altı filial isə Azərbaycanın bölgələrində açılacaq. Planlaşdırlan filialların açılışına yatırılacaq ümumi kapital 1697,4 min dollar təşkil edəcək. Ötən il bankın Bakı, Yevlax, Lənkəran və Bərdədə filialı açılıb.
"Nikoyl" 2007-ci ilin yekunları üzrə müddətli depozitlərin həcmini 69 faiz artıraraq 44,8 mln. manata çatdırıb. Azərbaycan iqtisadiyyatına kredit yatırımlarının həcmi il ərzində 107 faiz artaraq 97,6 mln. manata çatıb.
Bank tərəfindən cəlb edilən xarici borclanma 31,4 mln. dollar təşkil edir. Ötən ilin yekunu üzrə "Nikoyl" bankının xalis mənfəəti 1 705 min manat təşkil edib.
"Nikoyl" Rusiya kapitalının iştirak etdiyi Azərbaycan bankıdır. Bankın səhmdarlar strukturu bu formadadır: Rusiyanın "Topaz İnvestment" şirkəti 53,1 faiz səhm, "Nikoyl" QSİC - 28,7 faiz, "Uralsib-İnvest" - 17,9 faiz və "İSR-Holdinq" - 4,3 faiz.
Məqalə müəllifi ilə əlaqə ünvanı - [email protected]
