Azərbaycan, Bakı, 07 iyul/ Trend , müxbir İ.Xəlilov/ Ölkədə ədliyyə sisteminin modernləşdirilməsi layihəsi üzrə tədbirlərin icmalı üçün layihənin başçısı Devid Vernşteynin başçılıq etdiyi Dünya Bankının missiyası Bakıdadır, - bazar ertəsi bankın Bakı nümayəndəliyində bildiriblər.
Hazırda məsləhətçinin cəlb edilməsi, özəlləşdirmə xidmətlərinin göstərilməsi, mühəndis işlərinin həyata keçirilməsi üzrə texniki tapşırıqlar hazırlanır.
Missiya Bakıda iyulun 11-dək olacaq.
Layihə 4 komponentdən ibarətdir:
- idarəetmənin kompüter sisteminin, məlumat şəbəkəsi və treyninqin yaradılması ilə hüquq institutlarının idarəetmə bacarığının gücləndirilməsi;
- məhkəmənin imkanlarının artırılması - məhkəmə binalarının tikintisi və təmiri, idarəetmə sistemində müasir texnologiya və kompüterləşmənin tətbiqi;
- hakimlərin peşəkarlığının treyninqlər və mütəmadi təlimlər vasitəsilə gücləndirilməsi;
- vətəndaşların notariatda qeydiyyatı barədə olan məlumata daxil olmağa imkan verən mülki məlumatlandırma proqramları;
Layihənin ümumi dəyəri $35,6 milyon təşkil edir.Bankın kredit payı $21,6 milyondur. Yaponiyanın xüsusi fond hesabından $3 milyon qrant ayrılıb, AR hökumətinin iştirak payı $11 milyondur. Layihə beş ilə hesablanıb.
DB-nın krediti Beynəlxalq İnkişaf Assosiasiyası xətti ilə standart şərtlərlə 35 il müddətinə 10 illik güzəştli dövr olmaqla və illik 0,75 faizlə verilib. 10 illik güzəştli müddət bitdikdə, kreditin 1,25 faizlə ödənilməsinə başlanılacaq. 2026-cı ildən 2041-ci ilədək 2,5 faizlə ödəniləcək.
DB-nın Direktorlar Şurası 2006-cı il iyunun 29-da Azərbaycanın məhkəmə-ədliyyə sistemi üçün krediti təsdiq edib.
