Azərbaycan, Bakı, 14 iyul/ Trend , müxbir İ.Xəlilova/ Azərbaycanın iri özəl bankı Bank Standard bu gün Temenos Group AG şirkətindən yeni proqram təminatının tətbiq edildiyini elan edib. Bank Standard-ın İdarə Heyətinin sədr müavini Cavid Quliyev bazar ertəsi Temenos-un nümayəndələrinin iştirakı ilə keçirilən birgə mətbuat konfransında bildirilib ki, Temenos şirkətindən T24 bank sistemi birinci mərhələdə xidmət imkanlarına görə - böyük sayda depozit hesabları, avtokreditlər, ipoteka kreditləri, korporativ müştərilərin olmasına görə, ən iri "Arena" filialında qurulub.
Yeni sistem iyunun 23-dən real rejimdə işə salınıb və bu gün köhnə sistemlə paralel işləyir. Lakin iyulun 20-dən köhnə bank proqramı dayandırılacaq. Quliyevin sözlərinə görə, iki ay ərzində yeni proqram təminatı bütün bankda mövcud olan RS Bank 5.1 sistemini əvəz edəcək. Yeni sistem bütün bank əməliyyatlarının avtomatlaşdırılmasını təmin edəcək, xidmətlərin və sazişlərin sürətini təkmilləşdirəcək, həmçinin, yeni məhsul və xidmətlərin daha tez və səmərəli tətbiqi üçün əsas yaradacaq.
Sistemin əməli tətbiqinin birinci mərhələsi 2008 -ci ilin sonunadək bank proseslərinin tam şəkildə T24 -ə keçməsini nəzərdə tutur. Bankın institusional inkişaf və biznes-proseslər üzrə Departamentinin direktoru Samir Rzayev qeyd edib ki, hazırda digər filialların və baş ofisin yeni PT-yə keçidi, həmçinin, zəmanət və akkreditivlərin verilməsi ilə bağlı bütün növ əməliyyatları əhatə edən Trade Finance modulunun quraşdırılması üzrə fəal iş aparılır.
Bu modul 2006 -cı illə müqayisədə belə növ əməliyyatların 4,5 dəfə artmasından sonra xüsusilə aktual olub. Bunun ardınca üç əlavə modulun, daha dəqiqi, Internet Banking, Nostro Reconciliation və Securities modullarının optimallaşdırılması aparılacaq. Internet Banking modulunun quraşdırılması Bank Standard üçün dönüş nöqtəsi olacaq. Belə ki, o, İnternet-bankinqi tətbiq etmək və bununla da xidmətlərin əksəriyyətini İnternet-məkana çıxarmağa imkan verəcək.
Rzayevin sözlərinə görə, T24 -ün digər xüsusiyyətləri iş prosesində insan amilinin minimuma endirilməsi və üçpilləli avtorizasiya imkanının olmasıdır. Yeni PT bank əməliyyatlarını təhlükəsizləşdirməyə, biznes-prosesləri dünya səviyyəsinə çıxarmağa və bununla Bank Standard-ın infrastrukturunun sürətli inkişafını təmin etməyə imkan verir.
İdarə Heyəti sədri müavininin sözlərinə görə, yeni proqramın tətbiqi banka müştərilərə xidmət göstərilməsi prosesini və risklərin idarə edilməsi prosesini tam avtomatlaşdırmağa imkan verir və bu, Bank Standard-ın aktivlərinin yüksək artımı şəraitində xüsusilə zəruridir. 2006 - 2007-ci illər ərzində bankın aktivlərinin artımı, müvafiq olaraq, 170 və 140 faiz təşkil edib. Proqram bu artımı mənimsəməyə və gələcəkdə yeni bank məhsullarınının inkişafının, daxili proseslərin təkmilləşdirilməsinin, hesabatlılığın davam etdirlməsinə imkan verəcək.
Bank Standard Azərbaycanın bank sektorunda Temenos T24 -ün ilk istifadəçisi olub. Bank Standard Azərbaycanın ikinci və ölkənin ən iri özəl bankıdır. 2008 -ci il iyunun sonuna olan məlumatlara görə, bankın aktivlərinin ümumi həcmi 690,9 mln. manat ($851,2 mln) təşkil edib.
İyulun 14-nə olan cari məzənnə - 0,8057 AZN/USD.
Müəlliflə əlaqə saxlamaq üçün elektron ünvan: [email protected]
