Azərbaycan, Bakı, 16 iyul/ Trend Cap , müxbir İ.Xəlilova/ Azərbaycan-Rusiya birgə müəssisəsi AzRosPromİnvest avqustun birinci on günlüyünədək Qazax rayonunda "Daş Salahlı" yatağından bentonit gilinin hasilatı və emalı layihəsinin ikinci növbəsini vermək niyyətindədir. Bu barədə çərşənbə günü BM Direktorlar Şurasının sədri Natiq Şirinzadə məlumat verib. Bu o deməkdir ki, müəssisə neft-qaz sənayesi, maşınqayırma kompleksi, avtomobilqayırmanı yüksək keyfiyyətli bentonit tozu ilə təmin edə bilər.
Lakin üçüncü mərhələnin başa çatması ilə bağlı tələsməyə zərurət yoxdur. Belə ki, o, Avropa bazarlarına çıxmaq üçün nəzərdə tutulub. Şirinzadə bunun müəssisənin ixrac potensialının artmasına səbəb olmasına baxmayaraq, gəlirlərə cüzi təsir edəcəyini düşünür. Bununla əlaqədar, üçüncü mərhələ 2008-ci ilin sonunda istismara veriləcək. Əvvəllər tikinti müddəti bir neçə dəfə dəyişdirilib.
İkinci mərhələdən sonra zavodun istehsal gücü 50 min tonadək bentonit tozu və 100 min ton aktiv metanlı bentonit gilinədək artacaq. Hazırda müəssisənin istehsal həcmi 80-90 min ton gil təşkil edir. Üçüncü mərhələ istehsal gücünün 200 min tonadək artmasını təmin edəcək.
"Müəssisənin istehsalı 250 min tonadək artırması üçün imkanlar mövcuddur. Lakin biz istehsal gücünü bazarın tələbinə uyğun artırmaq niyyətindəyik", - Şirinzadə hesab edir.
Dünya qiymətlərinin bahalaşması ilə əlaqədar, layihədə sərmayələrin həcmi yenidən artıb. Layihənin tam reallaşdırılması üçün əvvəl elan edilən $12 mln.-a qarşı $25 mln. yönəldiləcək. Bu vəsaitlərdən Azərbaycan tərəfinin payına $12,5 mln. düşür. Məbləğ inflyasiya nəzərə alınmaqla aktivlərin yenidən qiymətləndirilməsi nəticəsində bu səviyyəyə çatıb. Əvvəllər Azərbaycan $6 mln. ödəməli olub. Rusiya tərəfi isə layihəyə nəqd pulla $12,5 mln. yatırır. Bu gün üçün artıq $9 mln.-dan çox vəsait yatırılıb.
Müəssisənin rəhbəri hesab edir ki, Rusiyanın Azərbaycana olan böyük marağı kompromis qərara gəlməyə imkan verir.
BM-in ərazisi 345 hektar təşkil edir və torpaq sahəsinin 180 hektarı yatağın altındadır.
BM-in yaradılmasına dair müqavilə 25 il müddətinə bağlanıb.
"Daş Salahlı" yatağının ehtiyatı 83 mln. tondur.
İyulun 16-na olan cari məzənnə 0,8054 AZN/USD.
Müəlliflə əlaqə saxlamaq üçün elektron ünvan: [email protected]
