Azərbaycan, Bakı, 26 avqust / Trend , müxbir S.Babayeva/ Azərbaycan prezidenti İlham Əliyevin sərəncamı ilə təsdiq edilən "2008-2015-ci illərdə Azərbaycanda əhalinin ərzaq məhsulları ilə etibarlı təminatı üzrə Dövlət Proqramı" ölkədə taxıl sahələrinin 900 min hektaradək artırılmasını nəzərdə tutur. Proqramda bildirilir ki, taxıl istehsalının hər hektara 32 sentener məhsuldarlıq ilə 2,8 mln. tonadək artırılması planlaşdırılır.
Digər kənd təsərrüfatı məhsulları istehsalının da artırılması planlaşdırılır. Ət istehsalının 340 min ton, süd və süd məhsullarının 2,4 mln. ton, quş məhsullarının illik sənaye istehsalının 80 min ton (o cümlədən 1,3 mlrd. ədəd toyuq yumurtası), kartof istehsalının 1,12 mln. ton, tərəvəz və bostan məhsullarının 1,72 mln. ton, meyvə istehsalının 800 min ton, şəkər çuğunduru üzrə əkin sahələrinin 20 min ha, çay yarpaqlarının 3 min ton, yüksək keyfiyyətli balanslaşdırılmış yemin illik 2 mln. tona çatdırılması gözlənilir.
Tədbirlərin yerinə yetirilməsi üçün maliyyə mənbələri kimi dövlət büdcəsi, qeyri-büdcə fondları, yerli büdcələr, yerli və xarici birbaşa sərmayələr və digər mənbələr göstərilib.
Dövlət Proqramı Azərbaycanda kənd təsərrüfatı məhsulları üzrə istehsal artımının stimullaşdırılması və gələcəkdə əhalinin yerli istehsal hesabına ərzaq ilə təminatının yaxşılaşdırılmasına yönəldilib.