Azərbaycan, Bakı, 26 sentyabr / Trend / Yaxın günlərdə Azərbaycan Nəqliyyat Nazirliyi yük daşımaları üçün təyin olunmuş və istismardan çıxarılmış kiçik avtobusların əvəzinə xəttə orta və geniş tutumlu yeni avtobuslar buraxacaq, - cümə günü nazirliyin yaydığı məlumatında deyilir.
Bakının mərkəzi küçələrində və prospektlərində yollardakı gərginliyi aradan qaldırmaq məqsədilə texniki tələblərə cavab verməyən kiçik tutumlu avtobusların hərəkətinə qadağa qoyulub. Nəticədə marşrutlardan təxminən 1000 kiçik tutumlu avtobus yığışdırılıb.
Hazırda respublikaya Almaniya, Koreya, Belorus və Çindən rahat orta və geniş tutumlu avtobuslar gətirilir ki, onlar da marşrutlara buraxılır.
"Elmlər Akademiyası" metrosu, Hüseyn Cavid prospekti, "İçəri Şəhər" mertosunadək olan ərazilərdə, həmçinn "Azneft" dairəsində və "Neftçilər" prospektində az tutumlu avtobusların hərəkəti tamamilə qadağan edilib. Lakin bu avtobuslar ikinci dərəcəli marşrut kimi istifadə oluna bilər. Orta və iri tutumlu avtobusların hərəkətinə qadağa qoyulmayıb.
Nazirlik şəhərin nəqliyyat sistemində nəqliyyatın idarə edilməsi üzrə intellektual sistemin yaradılması və yeni tipli dayanacaqların tikilməsindən başlamaqla, köklü dəyişikliklər etməyi planlaşdırıb.
Nəqliyyatın idarə edilməsi üzrə intellektual sistemin tətbiqi nəticəsində şəhərdə işıqfor və avtobus dayanacaqlarının sayı azalacaq. Onların sayı körpü, piyada keçidlərinin tikintisi sayəsində artıq azalıb. Bu sistemin yaradılması avtonəqliyyat vasitələrinin hərəkəti, sürəti, dayanacağı, nəqliyyat qəzaları, tıxac və digər hallarla bağlı məlumatları mərkəzi dispetçer məntəqəsinə operativ göndərməyə imkan verəcək. Nəqliyyatın idarə edilməsi üzrə intellektual sistemin üç il yarım ərzində yaradılması nəzərdə tutulub.
