Azərbaycan, Bakı, 14 oktyabr/ Trend , müxbir N.İsmayılova/ Avronun məzənnəsi əvvəlki mövqeyini bərpa edib və Azərbaycan Milli Bankının (AMB) məlumatına görə, oktyabrın 14 - də bir valyuta vahidinə görə 1,1062 manat təşkil edir. Oktyabrın 13-də avronun məzənnəsi 1,0946 manatadək düşərək, 2008-ci il ərzində ən aşağı göstərici olub.
"Son vaxtlar müşahidə etdiyimiz avronun məzənnəsinin güclənməsi Avropa İttifaqı, ABŞ, Çin, Yaponiya və bir sıra digər ölkələrin Mərkəzi banklarının gördükləri tədbirlərlə bağlıdır. Son bir neçə həftə bazarlarda azalma müşahidə olunub və müvafiq olaraq, Avropa valyutasının zəifləməsi baş verib", - Bakı Banklararası Valyuta Birjasının (BBVB) rəhbəri Fərhad Əmirbəyov çərşənbə axşamı bildirib.
Onun sözlərinə görə, dünyanın maliyyə sisteminin balansı açıq şəkildə pozulub və yalnız kommersiya sektorundan söhbət getmir. Aparıcı ölkələrin həyata keçirdikləri tədbirlərin kifayət qədər səmərəli olacağını zaman göstərəcək, - Əmirbəyov hesab edir. Belə baxış da mövcuddur ki, həyata keçirilən antiböhran tədbirləri yalnız vaxt qazanmağa və dünya iqtisadiyyatının resessiyaya düşməməsinə imkan verəcək. Sonra maliyyə bazarlarının son onilliklər ərzində fəaliyyət göstərdikləri prinsiplərin dəyişməsi ilə bağlı məsələləri həll etmək lazımdır.
Hadisələrin iki inkişaf variantı var: ya institutlar baş verəndən dərs götürəcək, bəzi maliyyə təsisatlarının iriləşməsi baş verəcək, ya da iqtisadiyyatın idarə edilməsində dövlətin rolu xeyli güclənəcək.
Ötən həftə Avropa İttifaqının Parisdə keçirilən iclasında maliyyə böhranına müqavimət Planı qəbul edilib. Sammitin yekunları üzrə Avropa ölkələri hökumətlərinin "vaxt əsasında" Avropanın əsas banklarına banklararası kreditlər üzrə zəmanət verəcəklərinə dair prinsipial qərar qəbul edilib.
Böyük Britaniya hökuməti üç iri banka - Royal Bank of Scotland, HBOS və Lloyds TSB-yə $64 mlrd. vermək və onların səhmlərinin bir hissəsini almaq barədə qərar qəbul edib. Öz növbəsində, Fransa hökuməti ölkənin bankları üçün banklararası kreditləşdirmə üzrə 320 mlrd. avroluq zəmanət təqdim edəcək. Almaniyanın təklif etdiyi xilas planına əsasən, ölkə hökuməti banklara veriləcək zəmanətlərin təmin edilməsi üçün 400 mlrd. avroyadək məbləğdə xüsusi fond yaradacaqlar.
"İqtisadiyyat üçün təhlükəli tendensiya qiymət trendlərinin istiqamətləri yox, bəzən xarici amillərin səbəb olduğu cari qiymətlərin gözlənilməz və xeyli dəyişməsidir", - Əmirbəyov bildirib.
2007- ci ilin yekunları üzrə avronun məzənnəsi bir valyuta vahidinə görə, 1,245 manat təşkil edib.
Müəlliflə əlaqə saxlamaq üçün elektron ünvan: [email protected]