Azərbaycan, Bakı, 21 oktyabr/ Trend , müxbir Ü.İsmayılova/ Sentyabrda Bakının ilkin daşınmaz əmlak bazrında bir kvadratmetr mənzil sahəsinin orta qiyməti 0,6 faiz - 1194 dollaradək artıb, - "Əmlak Bazarı İştirakçıları" İctimai Birliyindən çərşənbə axşamı bildiriblər. Avqustda ilkin bazarda "kvadratın" dəyəri 1187 dollar təşkil edib.
Sentyabrda ilkin bazarda mənzillərin orta sahə göstəricisi 120,1 kv. m təşkil edib ki, bu da avqustdan 0,2 faiz çoxdur (119,9 kv. m). Tikilən binaların orta blok sayı 2-3, orta mərtəbə göstəricisi -15,1.
Yeni tikililərin əksəriyyəti Yasamal rayonunda ucaldılıb. Tikilən obyektlərin sayına görə ikinci yeri paytaxtın Nəsimi, üçüncü yeri Xətai rayonu tutur. Bu rayonlar birlikdə Bakının daşınmaz əmlak bazarının ilkin portfelinin 66,7 fazini təşkil edir.
Sentyabrda Səbayel rayonunda qiymət artımı 2,6 faiz, Xətaidə 1,9 faiz, Nəsimidə 0,7 faiz təşkil edib. Bakının digər rayonlarında qiymətlər sabit qalıb.
Sentyabrda ilkin bazar portfelində üçotaqlı mənzillərin payı üstünlük təşkil edib. Beşotaqlı mənzillər, əsasən, Bakının I, birotaqlı mənizllər III zonasında təklif edilib.
Yeni tikilən binalarda birotaqlı mənzillərin orta sahəsi 60 kv.m, ikiotaqlı - 92,8 kv.m, üçotaqlı - 135,5 kv. m, dördotaqlı - 183,2 kv. m, beşotaqlı - 234,4 kv. m təşkil edib.
İctimai Birliyin monitorinqinin nəticələrinə əsasən, sentyabrda Bakıda 550 binanın tikintisi davam edib, iki binanın tikintisi və satışı başa çatıb. Evləri 207 tikinti şirkəti tikib.
Müəlliflə əlaqə saxlamaq üçün elektron ünvan: [email protected]
