Azərbaycan, Bakı, 23 oktyabr/ Trend , müxbir N.İsmayılova/ Dövlət Əmlakının İdarə Edilməsi üzrə Dövlət Komitəsinin məsləhətçisi - Finre Conslating kənd təsərrüfatı məhsullarının emalı sahəsindəki özəlləşdirilmiş müəssisələrin dəstəklənməsi layihəsi çərçivəsində, emaledici müəssisələri müəyyən edib, - cümə axşamı Dövlət Komitəsindən bildiriblər. Layihə 12 müəssisəni əhatə edəcək. Seçilmiş müəssisələr konserv, quşçuluq, şərabçılıq və un istehsalı sahəsindəndir.
Bu tədbirlər üçün ortamüddətli inkişaf strategiyası və onun realizəsi üçün taktiki planlar hazırlanır. Yerli və xarici ekspertlər cari problemlərlə tanış olmaq və təkmilləşdirmə üçün tələblərin müəyyən edilməsi məqsədilə, artıq müəssisələrdə olublar. Ekspertlər müəssisələrin cari vəziyyətini, bu müəssisələrin istehsal etdikləri malların yerli, regional və dünya bazarlarını təhlil ediblər.
Şirkətdən hesab edirlər ki, aparılan təhlil müəssisələrin ortamüddətli strateji hədəflərini müəyyənləşdirməyə imkan verəcək. Layihə ərzində bu müəssisələrdə strategiyanın realizəsinin dəstəklənməsi tədbirləri həyata keçiriləcək.
Noyabrda müəssisələrin menecer heyəti üçün treninqlər və xarici müəssisələrin təcrübəsi ilə tanış olmaq üçün Latviyaya səfər təşkil ediləcək.
Layihənin məqsədi özəlləşdirilmiş müəssisələrin bazar iqtisadiyyatı şəraitində uğurla fəaliyyət göstərməsi üçün onların institusional və maliyyə potensialının artırılmasıdır. Özəlləşdirmədənsonrakı sağlamlaşdırma üzrə tövsiyələr 2008 - ci ilin sonunadək hazırlanmalıdır.
Müəlliflə əlaqə saxlamaq üçün elektron ünvan: [email protected]
