Azərbaycan, Bakı, 28 oktyabr / Trend , müxbir N.İsmayılova/ "Azərbaycan bankı - "Bank Standard" Nizamnamə kapitalının həcminə görə Azərbaycanda üçüncü bank olub", - deyə çərşənbə axşamı keçirilən mətbuat konfransında Bankın İdarə Heyəti sədrinin birinci müavini Cavid Quliyev bildirib. Bankın Nizamnamə kapitalı 65 mln. manata çatıb.
"Dünya maliyyə böhnanına baxmayaraq, "Bank Standard" ilin əvvəlindən risklərin idarə edilməsi üzrə uğurlu siyasət və borc öhdəliklərinin düzgün qurulması sayəsində əsas maliyyə göstəricilərinin müsbət artımını saxlamağı bacarıb", - deyə Quliyev bildirib.
Sentyabrın 30 - na bank aktivlərinin ümumi həcmi 660,8 mln. manat təşkil edib. Son il ərzində artım 18 faiz (100,6 mln. manat) təşkil edib.
Sentyabrın sonuna olan vəziyyətə görə, verilən kreditlərin həcmi 441,6 mln. manata çatıb. Son il ərzində bu göstərici 36 faiz (117,0 mln. manat) artıb.
2008 - ci ilin üç rübünün yekunu üzrə müştəri hesablarına olan vəsait həcmi 174,5 mln. manat təşkil edib. İl ərzində bu göstərici 22 faiz (49,1 mln. manat) azalıb.
Hesabat dövrü ərzində fiziki və hüquqi şəxslərdən cəlb edilən müddətli depozitlərin ümumi həcmi 122,8 mln. manat olub. İl ərzində bu göstərici 21 faiz (33,3 mln. manat) azalıb.
Cari il ərzində vergitutmayadək mənfəət 13,4 mln. manat təşkil edib. İl ərzində göstərici üzrə artım 2,2 mln. manat təşkil edib.
"Bank Standard" 50 bankomata və 392 POS - terminala malikdir. 2008 - ci il aprelin 30-dək aktiv kartların miqdarı 22470 ədəd təşkil edib.
