Azərbaycan, Bakı, 01 noyabr/ Trend , müxbir İ.Xəlilova/ Azərbaycan hökuməti 2009-cu ilin dövlət büdcəsindən sosial ipotekanın maliyyələşdirilməsinə 14 mln. manat ayırmağı planlaşdırır, - hökumətdən şənbə günü bildiriblər.
Ölkədə AİF-in standartları üzrə ipoteka kreditləşdirməsi 2006-cı il martın 25-də, sosial ipoteka isə fevralın 7-də başlayıb. İpoteka kreditlərinə tələbat büdcədən ayrılmış vəsaitləri ötüb və iyunun ortalarından AİF öz standartları üzrə ipoteka kreditlərinin maliyyələşdirilməsini dayandırıb. Fond 2005-2007-ci ildə dövlət büdcəsindən 46 mln. manat alıb və 2008-ci ildə daha 34 mln. manat alacaq. Fondun banklara verdiyi kreditlərin maliyyələşdirilməsi üçün bu vəsaitlərdən 10 mln. manat həcmində ilk tranş artıq ayrılıb. AİF standartları üzrə kredit portfeli 67,8 mln. manat təşkil edir. Bankların ümumi ipoteka portfelinin həcmi 250-300 mln. manat təşkil edir.
Kreditlər üzrə dərəcələr 8 faizdən (AİF-in standartları üzrə) kommersiya banklarında 18-20 faizədək, müddət 10 ildən 25 ilədək dəyişir.
Lakin gələn ildə AİF ipoteka təcrübəsinin kommersiyalaşdırılmasından sonra ipoteka kreditləşdirməsini bərpa etmək niyyətindədir. Bu işdə fonda Beynəlxalq Maliyyə Korporasiyası yardım göstərir. Hazırda Almaniya Banklar Akademiyası İpoteka Fondu üçün gələcək fəaliyyət strategiyasını hazırlayır və noyabrda onu AMB-yə təqdim edəcək.
Hazırda AİF-də subsidiyalaşdırılmış ipoteka modeli tətbiq olunur ki, bu da ehtiyatlarda ipoteka maliyyələşdirməsini məhdudlaşdırır. İmkanların genişləndirilməsi və əlavə vəsaitlərin cəlb edilməsi üçün fondun əvvəlcə kommersiya ipoteka kreditləşdirməsi modelini tətbiq etməsi lazımdır.
AİF kreditləşdirməni dayandırdıqdan sonra, kommersiya bankları fəal surətdə ipoteka üçün xarici borclanma cəlb etməyə başlayıblar. Lakin dünya maliyyə böhranı ilə əlaqədar bu fəallıq azalıb. Qara dəniz Ticarət və İnkişaf Bankından 8 mln. dollar məbləğində ilk krediti 2007-ci ildə Texnika Bank alıb. 2008-ci ildə BMK mənzil maliyyələşdirməsi üçün UniBank-a 15 mln. dollar, Azerdemiryolbank-a isə 5 mln. dollar vəsait verib. BMK ilin sonunadək ipoteka kreditləşdirməsi üçün daha bir banka kreditin verilməsi imkanını nəzərdən keçirir.
Noyabrın 1-nə olan cari mübadilə məzənnəsi - 0,8095 AZN/USD.
Müəlliflə əlaqə saxlamaq üçün elektron ünvan: [email protected]