Azərbaycan, Bakı, 07 noyabr/ Trend , müxbir N.İsmayılova/ Azərbaycanın bəzi bankları istehlak kreditlərinin verilməsini bərpa etsələr də, bu kommersiya qurumlarının əksəriyyəti kreditləşdirmənin gələn ildən tez olmayaraq bərpa ediləcəyini gözləyir.
RabitaBank bu həftə istehlak kreditlərinin verilməsini bərpa edib. "Zaminin iştirakı ilə bankdan zəruri məbləğdə kredit almaq olar", - bankdan cümə günü bildiriblər.
Nikoil bankı üç min manatdan yuxarı məbləğdə kreditlər verir. Bankın tələbi əmlakın girov qoyulmasıdır. Bir həftədən sonra kiçik istehlak kreditlərinin verilməsi bərpa ediləcək, - Nikoil bankından bildiriblər.
ASBank istehlak kreditlərinin verilməsini noyabrın 15-dən sonra bərpa edəcək, - bankdan bildiriblər. Hazırda o, yalnız biznes-kreditlər verir.
Atabank və Amrahbank-dan bildiriblər ki, kreditləşdirməni noyabrda bərpa etmək niyyətindədirlər.
AzerTurkBank-dan bildiriblər ki, bank əvvəllər əməkdaşlıq etdiyi müəyyən müştərilərə, dövlət təşkilatlarında işləyən şəxslərə borc verir. AzerTurkBank özəl qurumlarda işləyən müştərilərə hələlik kreditlər vermir.
Xalq Bank-dan kreditlərin verilməsini dekabrın ortalarında bərpa edəcəklərini, hazırda bu prosesin dayandırıldığını bildiriblər.
Mugan Bank və Parabank-dan bildiriblər ki, istehlak kreditləşdirməsini bərpa edəcəkləri müddəti dəqiqləşdirə bilməzlər və hazırda yalnız biznes - kreditlər təqdim edirlər.
Bank Respublika kreditlərin bərpasını yanvaradək təxirə salıb. Əvvəllər bankdan istehlak kreditlərin verilməsinə noyabrda başlamaq niyyətində olduqlarını bildirmişdilər.
Atra Bank-dan bildiriblər ki, bank kreditlərin verilməsini dayandırmasa da, hazırda istehlak kreditləri 1500 manatdan çox olmayan məbləğdə və zamin təqdim edilməklə verilir.
NBC Bank- dan bildiriblər ki, bank yalnız Nurgun Motors şirkətindən avtomobillərin alınmasına kredit verir, digər kreditlərin verilməsi isə dayandırılıb.
Bank of Baku hazırda yalnız istehlak kreditləri versə də, pul borclanmaları hələ bərpa edilməyib.
AzeriGazBank-dan bildiriblər ki, bank "kiçik kreditlərin verilməsini dayandırmayıb" və hazırda əvvəlki rejimdə işini davam etdirir.
Gəncə şəhərində yerləşən Gandja Bank bütün növ kreditlərin verilməsini dayandırıb. Bankdan bildiriblər ki, kreditləşdirmənin bərpa ediləcəyi tarixi konkretləşdirə bilməzlər.
Türkiyənin Yapi Kredi Bank-nın Bakı filialı əmək haqqı 400 manatdan çox olan müştərilərə istehlak kreditləri verir. 1500 manatadək kreditin alınması üçün bir zamin, 3000 manatadək kredit üçün isə iki zamin tələb olunur. Bundan əlavə, 3000 manatdan yuxarı məbləğdə kreditlərin verilməsi üçün əmlakın girov qoyulması tələb olunur.
Digər banklardan - Azerdemiryolbank, United Credit Bank, Zamin Bank -dan bildiriblər ki, kreditlərin verilməsi hələlik dondurulub. Banklarda kreditləşdirmənin bərpa olunacağı tarixi konkretləşdirə bilməyiblər.
Kapital Bank istehlak kreditlərinin verilməsini oktyabrın əvvəlindən bərpa edib.
Royal Bank of Baku oktyabrın əvvəlindən tərəfdaşı olan mağazalardan malların alınmasına kreditlər verməyə başlayıb. Bank kreditləşdirmənin digər növlərini hələ bərpa etməyib.
Bank Standard və UniBank da istehlak kreditləşdirməsini oktyabrdan bərpa etsələr də, bu banklar borcların verilməsində seçim siyasəti mövqeyindən çıxış edirlər.
Noyabrın 7-nə olan cari mübadilə məzənnəsi -- 0,8086 AZN/USD.
Müəlliflə əlaqə saxlamaq üçün elektron ünvan: [email protected]
