Azərbaycan, Bakı, 08 noyabr/ , müxbirİ. Xəlilova/ Əmlakın İdarə edilməsi üzrə Dövlət Komitəsi "Şəki regional enerji təchizatı" Məhdud Məsuliyyətli Cəmiyyəti (MMC) və "Sumqayıtelektrikşəbəkə" Açıq tipli Səhmdar Cəmiyyətin "Xazar Management Systems" MMC -nin idarəçiliyinə verilməsi barədə saziş hazırlayıb. Bu barədə şənbə günü Dövlət Komitəsindən bildiriblər.
"Hazırda ölkə prezidentinin səhmdarlar tərəfindən idarəetmə barədə sazişin təsdiqi haqqında sərəncam layihəsi hazırlanıb və baxılmaq üçün Nazirlər Kabinetinə təqdim olunub", - deyə Dövlət Komitəsindən bildiriblər.
Dövlət Komitəsi elektrikpaylayıcı şəbəkələrin idarəetməyə verilməsi üzrə əvvəlki praktikadan imtina edib və tələbləri sərtləşdirib. Yeni şərtlərə əsasən, müqavilələr idarə- etməyə, əvvəllər olduğu kimi, 25 il müddətinə deyil, beş illiyə verilməklə imzalanacaq. Bu dövr başa çatdıqdan sonra, sərmayədar bütün tələbləri yerinə yetirərsə, müqavilə daha beş il müddətinə uzadıla bilər.
Digər şərt ondan ibarədir ki, şəbəkələrin aktivləri dövlətin sərəncamında qalacaq, sərmayədar isə, onları yalnız idarə edəcək.
"Xazar Management Systems" beş il müddətində Sumqayıt şəbəkəsinə 85 mln. dollar, Şəki regional şəbəkəsinə 11 mln. dollar yatırılmasını üzərinə öhdəlik götürüb.
Sərmayədar əhalini müntəzəm elektrik enerjisi verilişi ilə təmin etməli, itkiləri azaltmalı, vəsait yığımını artırmalı və tədarük olunan elektrik enenrjisinə görə "Azərenerji" SC-yə ödəmələri vaxtında həyata keçirməldir. Şərtlər yerinə yetirilmədikdə, müqavilə ləğv ediləcək.
Əvvəllər Sumqayıt şəbəkəsini Türkiyənin "Barmek" şirkəti idarə edirdi. Lakin müqavilə şərtlərinin pozulmasına görə, onunla saziş pozulub və şirkətin rəhbəri Hüseyn Arabula və bir sıra əməkdaşlarına qarşı cinayət işi qaldırılmışdı. Şəki şəbəkəsini Azərbaycanın "Bayva" şirkəti idarə edirdi, lakin sərmayə yatırmaq üçün vəsaitin olmadığından, müqaviləni pozub. Şəki elektrikşəbəkə Şəki şəhəri, Sabit Rəhman küçəsi,6 ünvanında yerləşir, Şəki, Zaqatala, Qax, Balakən və Oğuz rayonları ərazilərinə xidmət göstərir. Müəssisənin işçi heyəti 744 nəfərdən ibarədir. MMC-nin Nizamnamə kapitalı 1827, 36 min manatdır.
Sumqayıt elektrikşəbəkə Sumqayıt şəhəri, Əfəndiyev küçəsi, 8 ünvanında yerləşir. O, Sumqayıt və Xırdalan şhərləri, Abşeron, Qoubustan, Xızı, Siyəzən, Dəvəçi, Quba, Qusar, Xaçmaz, Binəqədi və Sabunçu rayonları ərazilərinə xidmət göstərir. Müəssisənin işçi heyəti 1879 nəfər təşkil edir. SC - nin Nizamnamə kapitalı 11415,89 min manatdır və ona, hər birinin nominal dəyəri iki manat olan 5707,944 səhm buraxılıb.
Noyabrın 8 -nə olan rəsmi məzənnə 0,8086 AZN/USD təşkil edir.
Məqalə müəllifi ilə əlaqə ünvanı - [email protected]
