Azərbaycan, Bakı, 10 noyabr/ Trend , müxbir S.Babayeva/ İnformasiya texnologiyalarının insanın həyat fəaliyyətinin müxtəlif sahələrində tətbiqinin templərinə görə bu gün Azərbaycan MDB məkanında liderlərdən biridir, - HP-nin Rusiya və MDB ölkələri üzrə baş direktoru Rudi Kozak hesab edir.
Onun sözlərinə görə, Azərbaycanın İKT sektoruna yaxından nəzər yetirdikdə dərhal iki əsas inkişaf istiqamətini müəyyən etmək olar - "müxtəlif sahələrin fəaliyyətlərinin təmin edilməsi üçün texnologiyalar" və "yeni iqtisadiyyat".
Azərbaycanın dövlət sektorunda, təhsilində, biznesin müxtəlif seqmentlərində informasiya texnologiyalarının sistemli tətbiqi həyata keçirilir. Diqqətə layiqdir ki, HP şirkəti bu cür yüksək səviyyəli layihələrin reallaşdırılmasında Azərbaycanın fəal tərəfdaşlarındandır. Bundan əlavə, HP texnologiyaları maliyyə sahəsində də fəal şəkildə tətbiq olunur və artıq ölkənin bir neçə aparıcı bankları öz informasiya sistemlərini HP həllərinin yardımı ilə qurub.
Kozak informasiya texnologiyalarının təhsil sistemində sistemli şəkildə tətbiq olunmasını müsbət bir hal kimi qiymətləndirib. HP şirkəti Azərbaycanda orta təhsilin informatlaşdırılması prosesinin fəal iştirakçısıdır. Bu proses artıq yeni bir səviyyədə davam edir və hökumətin təhsilə göstərdiyi böyük diqqəti alqışlamaq lazımdır. Təhsil sektorunun dəstəklənməsi üçün milli valyutada onlarla milyon manat vəsait ayrılıb. "İnformasiya texnologiyaları əsasında yeni tədris platformasının yaradılması ölkənin yüksək texnologiyalar sahəsindəki kadr potensialını daha da artırmağa imkan verəcək", - HP-nin Rusiya və MDB ölkələri üzrə baş direktoru Kozak sözünü yekunlaşdırıb.
HP şirkətinin Sovet İttifaqı ərazisində fəaliyyəti 1968-ci ildə başlayıb. HP şirkəti MDB-nin bütün ölkələrində və Monqolustanda təmsil olunub. Hazırda Birlik ölkələrinin ərazisində - Kiyev, Bakı, Almatı və Astanada şirkətin dörd nümayəndəliyi açılıb və fəaliyyət göstərir.
