Azərbaycan, Bakı, 12 noyabr / Trend , müxbir Ü.İsmayılova/ "Bakıdakı bir çox alqı -satqı şirkətləri fəaliyyətlərini dayandırıblar. Səbəb alıcı tələbatının heç olmamasıdır", - çərşənbə günü MBA Group Konsaltinq şirkətinin eksperti Faiq İbrahimov belə deyib.
"Ölkənin daşınmaz əmlaq bazarında bu cür durğunluq heç vaxt müşahidə olunmayıb", - İbrahimov bildirib.
Onun sözlərinə görə, son həftədə daşınmaz əmlaka baxış da olmayıb və gün ərzində əmlakla bağlı cəmi iki - üç zəng daxil olur.
"Alqı - satqı ilə bağlı sonuncu razılaşma oktyabr ayında imzalanıb", - İbrahimov söyləyib.
Ekspertin fikrincə, belə vəziyyət alıcıların qiymətdüşməsini gözləmələrilə bağlıdır, satıcılar isə, qiymətləri 5 faizdən çox aşağı salmırlar. Əvvəllər birotaqlı mənzili 35 - 40 gün ərzində satmaq olardısa, bu gün ekspozisiya müddəti 5 dəfə artıb.
Alqı - satqı şirkətində çalışanlar hesab edirlər ki, yaxın bir neçə həftə ərzində daşınmaz əmlak daha 3 -5 faiz ucuzlaşacaq. Real alıcı çıxarsa, satıcı artıq qiyməti salmağa hazırdır, yeni tikilən binalarda mənzillərin qiyməti, təkrar bazarda aşağı düşüb.
İbrahimov bildirib ki, oktyabrda Bakının daşınmaz əmlak bazarında 5,6 min mənzil təklif olunub, bazarda təkliflər 30 - 35 faiz artıb, tələbat isə 15 -20 faiz azalıb.
"Ölkənin daşınmaz əmlak bazarında bu cür vəziyyət- maliyyə böhranı, istehlakçı və ipoteka kreditlərinin azalması ilə bağlıdır - ilin sonunadək davam edəcək və daha da gərginləşəcək" - İbrahimov proqnoz verib.
Məqalə müəllifi ilə əlaqə ünvanı: [email protected]
