Azərbaycan, Bakı, 24 noyabr/ Trend , müxbir E.İsmayılov / Zaqatala şəhərinin mərkəzində Talaçay çayı üzərində tikilən Azərbaycanda ilk asma körpü 2009 - cu ilin birinci yarısında istifadəyə veriləcək. Bu barədə bazar ertəsi Azərbaycan Nəqliyyat Nazirliyindən bildiriblər. Əvvəllər körpünün 2008 - ciilin sonunadək istismara verilməsi planlaşdırılırdı.
"Yeni körpü, çox güman ki, gələn ilin birinci yarısında istifadəyə veriləcək. İşlərin başa çatdırılması üçün vəsait hələ ayrılmayıb", - deyə mənbə bildirib.
Layihənin ilkin dəyəri iki mln. manat təşkil edirdi. Lakin əlavə xərclərə görə, smeta dəyəri iki dəfə artıb. Körpünün tikintisi, əsasən, yerli mütəxəssislər tərəfindən aparılır. Dəmir -beton konstruksiya Heydər Əliyev adına Bakı Dərin Özüllər Zavodunda harzılanıb.
Zaqatala rayon Yol İstismar İdarəsinin (17 saylı) müdiri Mövlud Qəhrəmanovun əvvəllər bildirdiyinə görə, körpünün eni 11 metr, uzunluğu 170 metrdir. Layihənin sifarişçisi "Azəryolservis" ASC, icraçısı "Texnikaservis" şirkətidir.
Şəki -Zaqatala yolunda yerləşən asma körpünün tikintisinə 2007-ci ilin sonunda başlanıb.
Zaqatala rayonu respublikanın şimal- qərbində, paytaxtın 418 km - də yerləşir.
Məqalə müəllifi ilə əlaqə ünvanı- [email protected]
