Azərbaycan, Bakı, 26 noyabr/ Trend / Çərşənbə axşamı Gürcüstanın "Batumi" vokal ansamblı Ü.Hacıbəyov adına Bakı Musiqi Akademiyasında konsert proqramı ilə çıxış edib. Konsert Gürcüstanın Azərbaycandakı səfirliyinin təşkilatçılığı və Azersun Holding-in maliyyə dəstəyi ilə baş tutub. Azersun-un məlumatında bildirilir ki, konsertdə hökumət və diplomatik dairələrin nümayəndələri iştirak edib.
Konsertin açılışında çıxış edən Gürcüstanın Azərbaycandakı səfiri Nikoloz Natbiladze mədəniyyət sahəsində iki ölkə arasında dostluq münasibətlərinin yüksək səviyyədə oldğunu qeyd edib.
O, bu əlaqələrin möhkəmlənməsinə əyani nümunə olan konsert proqramının təşkilində göstərdiyi dəstəyə görə, Azersun Holding-ə təşəkkürünü bildirib.
Daha sonra xor ustası və proqramın aparıcısı Nodar Vaşanidze çıxış edib.
Konsertin proqramına Casunq Kaxidze, Revaz Laqidze və Qeorqi Sabadzenin əsərlərinin daxil edilib.
"Batumi" konsertə Azərbaycan və Gürcüstanın dövlət himnləri ilə başlayıb. 13 nəfərdən ibarət olan ansambl "Bəri gəl" mahnısını da ifa edib.