Azərbaycan, Bakı, 23 dekabr/ Trend , müxbir N.İsmayılova/ "Qarşıdakı illərdə Azərbaycanda korporativ idarəetmə (Kİ) təkmilləşəcək", - Beynəlxalq Maliyyə Korporasiyasının (BMK) Azərbaycanda korporativ idarəetmə layihəsinin hüquqi məsələlər üzrə müşaviri Anar Əliyev "Korporativ idarəetmə maliyyə böhranına cavab kimi" seminarında bildirib.
"Korporativ idarəetmənin ən çox bank sektorunda inkişaf etdiyi müşahidə olunur, - Əliyev vurğulayıb. - Belə ki, bu sektorun inkişafı həmişə irəlidə olub".
Onun sözlərinə görə, sığorta şirkətləri və bəzi kommersiya şirkətlərində də korporativ idarəetmə tətbiq olunur.
"Azərbaycan İnvestisiya Şirkətinin yaradılması, çox sayda digər sərmayədarların meydana çıxması da korporativ idarəetmənin inkişafına stimul olub", - Əliyev deyib.
Onun sözlərinə görə, Azərbaycanda korporativ idarəetmənin təkmilləşdirilməsi prosesi beş ildən çox vaxt aparacaq. Belə ki, o, yalnız formal tələblərə əməl etməli olmayan müəyyən prosedurlar qaydasını təcəssüm etdirir.
"Kİ-nin Azərbaycanda tətbiqi metodologiyası ABŞ və Avropa ölkələri kimi digər ölkələrdə idarəetmənin tətbiqi metodologiyalarından fərqlənməsə də, bu ölkə üçün bəzi səciyyəvi elementlər nəzərə alınacaq", - Əliyev yekunlaşdırıb.
BMK-nın irəli sürdüyü və İsveçrənin İqtisadi İnkişaf üzrə Dövlət Katibliyi Seco tərəfindən maliyyələşdirilən layihənin rəsmi açılışı 2005-ci il noyabrın 26 - da olub. 2,1 mln. dollar ümumi büdcəsi olan layihənin birinci mərhələsinin realizəsi üç ilə nəzərdə tutulmuşdu. Hazırda dörd mln. dollardan çox vəsait ayırmış Seco-nun maliyyələşdirdiyi ikinci mərhələ çərçivəsində, pilot şirkət və bankların seçimi gedir.
Müəlliflə əlaqə saxlamaq üçün elektron ünvan: [email protected]