Azərbaycan, Bakı, 23 dekabr/ Trend , müxbir N.İsmayılova/ 2009-cu il yanvarın 1-dən Azərbaycanın Estoniya, Bolqarıstan və Koreya Respublikası ilə imzaladığı "Gəlir və əmlaka münasibətdə ikiqat vergitutmanın və vergilərin ödənilməsindən yayınma faktlarının aradan qaldırılması haqqında" Konvensiya qüvvəyə minir, - Azərbaycanın Vergilər Nazirliyindən çərşənbə axşamı bildiriblər.
Estoniya ilə saziş Azərbaycanda hüquqi şəxslərin mənfəət verigisi, fiziki şəxslərin gəlir vergisi, əmlak vergisi və torpaq vergisini, Estoniya ərazisində gəlir vergisini əhatə edir.
Konvensiya və protokol 2007-ci il oktyabrın 30 - da Bakıda imzalanıb. Konvensiya üç il müddətinə bağlanılıb.
Bolqarıstanla saziş Azərbaycanda hüquqi şəxslərin mənfəət vergisi, fiziki şəxslərin gəlir vergisi, əmlak vergisi və torpaq vergisini əhatə edir. Bolqarıstan ərazisində o, şəxsi gəlirlər vergisi, korporativ vergilər, yekun vergi və daşınmaz əmlak vergisini əhatə edir.
Konvensiya və protokol 2007-ci il noyabrın 12-də Bakıda imzalanıb. Konvensiya beş il müddətinə nəzərdə tutulub.
Cənubi Koreya ilə saziş Azərbaycanda hüquqi şəxslərin mənfəət vergisi, fiziki şəxslərin gəlir vergisi, əmlak vergisi və torpaq vergisini əhatə edir. Koreya ərazisində o, gəlir vergisi, korporativ vergi, vətəndaş vergisi və kənd təsərrüfatının inkişafı üçün əlavə vergini əhatə edir.
Konvensiya və protokol 2008-ci il mayın 18-də Bakıda imzalanıb. Konvensiya beş illikdir.
Bu günə Azərbaycanın Vergilər Nazirliyi 25 ölkə ilə ikiqat vergitutmadan yayınma haqqında saziş imzalayıb. Onlardan beşi ilə bu sazişlər 2009-cu ildən qüvvəyə minir.
Müəlliflə əlaqə saxlamaq üçün elektron ünvan: [email protected]