Azərbaycan, Bakı, 06 yanvar/ Trend , müxbir Ü.İsmayılova/ Yeni ilin ilk günlərində Bakının daşınmaz əmlak bazarında passivlik və durğunluq davam edir. Bu barədə çərşənbə axşamı MBA Group konsaltinq şirkətinin baş direktoru, ekspert Nüsrət İbrahimov bildirib.
"Bazarda yaranan vəziyyət səbəbindən satıcılar qiymətlərdə təqribən 20 faiz güzəştə gedirlər", - deyə İbrahimov bildirib.
Onun sözlərinə görə, buna baxmayaraq, bazarda güzəştə getməyən və bazarın canlanmasını gözləyən satıcılar və qiymətlərin əlavə olaraq düşməsini gözləyən alıcılar da var. Bununla belə, daşınmaz əmlak obyektinin ekspozisiya müddəti üç dəfə artaraq 170 günə çatıb, 2008-ci ilin əvvəlində obyektin 46 günə satış müddti normal hesab olunurdu.
İbrahimov hesab edir ki, bütün bunlar daşınmaz əmlak bazarında likvidlik probleminə gətirib çıxarır. Bu gün Azərbaycanda tikinti sektorunun ÜDM-da payı təqribən yeddi faiz, kredit portfelində 6,1 faiz, ölkə iqtisadiyyatında isə təqribən 35-40 faiz təşkil edir. Müvafiq tikinti materiallarının təqribən 300 növünün satışı tikinti sektorunun fəallığından asılıdır.
MBA Group-un məlumatlarına görə, Bakıda mənzilin bir kvadrat metrinin orta qiyməti (kvadrat metrə görə dollarla): Yeni Yasamal qəsəbəsində - 1451, Günəşli qəsəbəsində - 1187; Montin qəsəbəsində - 1869; Sabunçu qəsəbəsində - 1292; Xırdalanda - 1007; Əhmədlidə - 1323; Nizami küçəsində (Torqovaya) - 2570; Xəqani küçsində - 2930; İçəri şəhər metrosu ərazisində - 2257; Sahil metrosu yaxınlığında - 2630; Fəvvarələr meydanında - 3676 dollar təşkil edir.
Məqalə müəllifi ilə əlaqə ünvanı - [email protected]
