Azərbaycan, Şəki, 06 yanvar/ Trend , müxbir X.Əliyeva/ "Cari ildə Şəkinin hava limanında təmir işlərinin aparılması və reyslərin bərpası planlaşdırılır", - Şəki hava limanının rəisi Çingiz Süleymanov çərşənbə axşamı bildirib.
"Şəki hava limanı fəaliyyətə başlayarsa, burada beynəlxalq reyslərin açılması mümkündür. Son iki il ərzində respublika ərazisində bəzi regional aeroportların bərpasına baxmayaraq, 1932-ci ilin martında öz işinə başlamış Şəki hava limanı artıq 10 ildir ki, fəaliyyət göstərmir", - Süleymanov deyib.
Onun sözlərinə görə, 1998-ci ilədək aeroport Şəki-Bakı və əks istiqamətdə hər gün bir reys həyata keçirib. Sakinlərin daha çox bu nəqliyyat növünə üstünlük vermələrini nəzərə alaraq, o vaxtlar hətta reyslərin sayını artırmaq nəzərdə tutulurdu. 134 ha sahədə yerləşmiş aeroportda sərnişin və yük daşınmaları həyata keçirilirdi.
"Sərnişin və yük daşınmaları həyata keçirilərkən Şəkinin Naxçıvanla, həmçinin digər ölkələrlə birbaşa əlaqəsindən əldə olunacaq fayda aydın olacaq", - Şəkinin hava limanının rəisi vurğulayıb.
Bütün avadanlıq və naviqasiya sistemləri aeroportun fəaliyyətinin dayandığı andan saxlanılıb. Bir vaxtlar 23 nəfərin işlədiyi hava limanında hazırda ərazinin mühafizəsini həyata keçirən və avandalığın yaxşı saxlanmasını təmin edən doqquz nəfər çalışır.
Əhalisi 180 min nəfərdən çox olan Şəkidə hava nəqliyyatına xüsusi zərurət və maraq mövcuddur. Turistlər hava nəqliyyatına üstünlük verdikləri üçün infrastruktur baxımından hava limanının bərpası regionda turizmin inkişafında mühüm rol oynaya bilər.
Müəlliflə əlaqə saxlamaq üçün elektron ünvan: [email protected]