Azərbaycan, Bakı, 22 yanvar / Trend , müxbir Ü.İsmayılova/
Azərbaycan Maliyyə Nazirliyi 2009-cu ildən Bakı Fond Birjasında qısamüddətli dövlət istiqrazları ilə yanaşı orta və uzunmüddətli istiqrazlar da yerləşdirməyi planlaşdırır, - nazirlikdən cümə axşamı bildiriblər.
Müxtəlif ödəmə müddətli dövlət istiqrazlarının yerləşdirilməsi yanvarın 23-də baş tutacaq. Maliyyə Nazirliyi yerləşdirməni elan edib:
- hər birinin nominal dəyəri 200 manat olmaqla ümumi dəyəri 18 mln. manat olan istiqrazlar 35 gündən sonra ödəniləcək;
- hər birinin nominal dəyəri 200 manat olmaqla ümumi dəyəri 25 mln. manat olan istiqrazlar 91 gündən sonra ödəniləcək;
- hər birinin nominal dəyəri 200 manat olmaqla ümumi dəyəri 3 mln. manat olan istiqrazlar 364 gündən sonra ödəniləcək.
Azərbaycanın Mülki Məcəlləsinə əsasən, Maliyyə Nazirliyinin buraxdığı dövlət istiqrazları Bakı Fond Birjası vasitəsilə yerləşdirilir. Bu qiymətli kağızların emissiyasının əsas məqsədi ölkənin dövlət büdcəsinin kəsirini maliyyələşdirməkdir.
Ölkə hökuməti hələ 2008-ci ildən uzunmüddətli dövlət istiqrazlarının dövriyyəyə buraxılması və sərmayədarlar şəbəkəsinin genişləndirilməsinə hazırlaşırdı. Bununla əlaqədar, iki, üç və beş il dövriyyə müddətli dövlət kağızlarının emissiyası üçün hazırlıq gedirdi.
Dövlət qiymətli kağızlarının buraxılışı, dövriyyəsinin təşkili qaydaları təkmilləşdirilib. Əvvəllər qaydalar 1 ilədək müddətli kağızların buraxılmasına yol verirdi.
2006-cı ildən Maliyyə Nazirliyi ilk dəfə olaraq bu gün tələbatın artmaqda olduğu illik dövlət qısamüddətli istiqrazlarının buraxılışına başlayıb.
Son illərdə ölkənin dövlət kağızları bazarında iştirakçıların dairəsi də genişlənib. Əvvəllər onların əsas alıcıları kimi banklar çıxış edirdilərsə, indi sığorta şirkətləri və digər hüquqi şəxslər bu istiqamətdə fəaliyyət göstərir. Dünya likvidlik böhranı ilə əlaqədar əksər sərmayədarlar öz vəsaitlərini geri çağırmağa başlasalar da, münasib faiz dərəcələrinə (5-6 faiz civarında) görə xarici sərmayə fondları və bankları tərəfindən də onlara tələbat artır.
Qiymətli kağızlar vasitəsilə azad pul kütləsinin dövriyyədən dövlət büdcəsinə çıxarılması məqsədilə bu gün dövlət kağızları bazarında iştrak edə bilməyən fiziki şəxslər üçün yeni alətin tətbiqi nəzərdə tutulur. Bu qiymətli kağızlar 2007-ci ilədək Kapital Bank vasitəsilə yerləşdirilən uduşlu dövlət borclarının alternativi olacaq.
Yanvarın 22-nə olan cari mübadilə məzənnəsi - 0,8044 AZN/USD təşkil edir.
Müəlliflə əlaqə saxlamaq üçün elektron ünvan: [email protected]
