Azərbaycan, Bakı, 29 yanvar / Trend , müxbir İ.Xəlilova/
"Azərbaycan Milli Bankının (AMB) idarə heyətinin qərarı ilə fevralın 2-dən etibarən uçot stavkası 3 faiz endirilərək 5 faizə çatdırılıb", - cümə axşamı AMB-nin mətbuat xidmətindən məlumat verilib. Faiz dəhlizinin yuxarı həddi 13 faizdən 10 faizə qədər endirilib. Manat və xarici valyutada məcburi ehtiyat norması 6 faizdən 3 faizə qədər endirilib.
"Qlobal iqtisadi böhranın dərinləşməsi şəraitində, 2009-cu ilin pul siyasətinin istiqamətinə uyğun olaraq Milli Bank, makroiqtisadi tarazlığın, maliyyə sabitliyinin dəstəklənməsi və ölkədə iqtisadi fəallığın saxlanılması məqsədilə onun yüngülləşdirilməsini davam etdirir", - AMB-dən bildirilib.
Ötən il həyata keçirilmiş analoji tədbirlər inflyasiya ehtimalını azaltmaq, eləcə də böhranın bank sektoruna nəzərəçarpan dərəcədə təsirini yox etmək imkanı verdi.
Kurs siyasətinin çevikliyinin artırılması üçün bivalyuta səbətinin struktur parametrləri yenilənmişdir ki, bu da ölkədə rəqabət qabiliyyətini və maliyyə sabitliyini saxlamaq imkanı verəcək.
Ötən il AMB-nin stavkası üç mərhələdə 15 faizdən 8 faizə qədər azaldılıb.
Məqalə müəllifi ilə əlaqə ünvanı: [email protected]