Türkmənistan, Aşqabad, 12 fevral / Trend , müxbir E.Həsənov/ "Türkmənistan Mərkəzi Bankının (TMB) prosessinq mərkəzinin bazasında fəaliyyət göstərən "Altın Asır" vahid ödəmə sistemi plastik kartlarının sahibləri geniş xidmət spektrinə çıxış əldə edə biləcəklər", - TMB məlumat verir.
Yaxınlarda yeni bankomatların köməyi ilə rabitə xidmətləri, elektrik enerjisi və kommunal xidmətlər üzrə qeyri-nağd hesablaşmalar aparmaq mümkün olacaq. Buraya həm də kreditlərin ödənilməsi, depozit əməliyyatları, digər ödəmə sistemi plastik kart sahibləri ilə elektron pul vəsaitlərinin köçürülməsi də daxildir.
Bu tədbirlər bütün Türkmənistan ərazisində qeyri-nağd hesablaşmalar şəbəkəsini genişləndirməyə imkan verir. Bunun hesablaşmaların sadələşdirilməsi, eləcə də milli iqtisadiyyatın dünya qeyri-nağd ödəmə sisteminə inteqrasiyası istiqamətində böyük əhəmiyyətə malik olacağı gözlənilir.
Bank xidmətlərinin yüksək texnologiyalarla təminatı məqsədilə yaxınlarda prosessinq mərkəzinin texniki yenilənməsi həyata keçirilib. Mərkəzi Bankın bu struktur bölməsi hesablaşma iştirakçıları arasında informasiya və texnoloji qarşılıqlı fəaliyyətini həyata keçirir və plastik kartlarla bağlı əməliyyatların bankdaxili emalını təmin edir.
TMB-nin məlumatında deyilir ki, mərkəzin əsas məqsədi - bütün ölkə ərazisində sabit və təhlükəsiz plastik kartlardan istifadə edərək qeyri-nağd ödəmə sisteminin yaradılmasıdır. Məhz bu məqsəd üçün Türkmənistanın vahid ödəmə sistemi "Altın Asır" hazırlanmışdır.
Məqalə müəllifi ilə əlaqə ünvanı: [email protected]
