Azərbaycan, Bakı, 14 fevral / Trend , müxbir N.İsmayılova/ "Dünya Bankının (DB) Azərbaycanda maliyyə xidmətlərinin inkişafı layihəsinə ayrılmış vəsaitlərin ümumi həcmindən yalnız 18,1 faizi, yaxud 2,39 milyon dolları istifadə olunub", - Bankın məlumatında deyilir.
Layihənin dəyəri 13,19 milyon dollar təşkil edir. Ondan 10,76 milyon dolları istifadə olunmamış hissədir.
Layihənin məqsədi ölkədəki qeyri-neft sektoru və regional inkişafla bağlı iqtisadi islahatlar və kasıblığın azaldılması strategiyalarının həyata keçirilməsinin asanlaşdırılmasıdır. Buna öz növbəsində maliyyə arxitekturasının təkmilləşdirilməsi və kənd əhalisinin maliyyə xidmətlərinə çıxış imkanlarının artırılması yolu ilə nail olunması gözlənilir.
Məlumatda deyilir ki, 2008-ci ilin birinci yarısından etibarən layihənin yerinə yetirilməsi tempi sürətləndirilib.
Layihə DB-nin direktorlar şurası tərəfindən 2005-ci il yanvarın 6-da qəbul edilib və onun 2009-cu il iyunun 30-da başa çatdırılması gözlənilir.