Azərbaycan, Bakı, 25 fevral / Trend , müxbir Ü.İsmayılova/ "Dünya maliyyə böhranı Dünya Bankına Azərbaycan üçün yeni layihələrin hazırlanması və təsdiqinə mane olmayacaq", - çərşənbə günü DB-nin Bakı nümayəndəliyinin rəhbəri Qreqori Yeceyçak deyib.
Onun sözlərinə görə, hazırda yeni yolların tikintisi və infrastrukturun təmkilləşdirilməsi sahələrində layihələr üzərində iş gedir. Bununla yanaşı, məcburi köçkünlərin durumunun yaxşılaşdırılması və infrastruktur sahəsində işə cəlb olunmuş mütəxəssislərə treninqlər keçilməsi üçün vəsait ayrılması planlaşdırılır.
"İyula qədər bu layihələrin hökümətlə razılaşdırılması planlaşdırılır", - Yeceyçak bildirib.
Bu günə qədər DB Azərbaycanda ümumi dəyəri 2 milyarddan çox olan 45 layihəni maliyyələşdirib. Sadəcə ötən maliyyə ilində DB tərəfindən 13 layihəyə 1,251 milyard dollar yönəldilib. Bununla da DB strategiyasının dörd ilə hesablanmış büdcəsi iki ilə mənimsənilib.
DB strategiyanın qarşıdakı iki ili ərzində (2009-2010-cu illər) ölkəyə bir milyard dollardan çox vəsait verməyə hazır olduğunu bildirib. Fərq isə onda olacaq ki, bu pullar kommersiya şərtləri - Beynəlxalq Yenidənqurma və İnkişaf Bankı xətti ilə veriləcək.
Məqalə müəllifi ilə əlaqə nüvanı: [email protected]
