Azərbaycan, Bakı, 29 mart / Trend , müxbir E.İsmaylov /
Azərbaycan Nəqliyyat Nazirliyindəki mənbənin verdiyi məlumata əsasən, Bakıda nəqliyyatın intellektual sistemlə idarə olunması mərkəzinin tikilməsi aprelin birinci yarısına köçürülüb. Bir müddət öncə tikinti işlərinin mart ayının sonunda başlanılacağı planlaşdırılmışdı.
"Öncə təyin olumuş vaxtın bayram günləri ilə üst-üstə düşdüyündən tikinti işlərinin aprelin ilk yarısında başlanılması qərara alınıb", - məlumatı verən mənbə deyib.
Novruz bayramı ilə əlaqədar olaraq martın 20-dən 28-dək Azərbaycanda qeyri-iş günləri elan olunmuşdu.
Mərkəzin yeri artıq bəllidir. Nəqliyyatın intellektual idarə olunması mərkəzi Heydər Əliyev prospektində keçmiş Keşlə Maşınqayırma Zavodunun ərazisində inşa ediləcək.
İntellektual idarə olunma sistemi əhaliyə nəqliyyatda itirdikləri vaxtı minimuma endirməyə, yol hərəkətini nizama salmağa və nəqliyyat sistemindəki gərginliyi aradan qaldırmağa kömək edəcək.
Mənbənin öncələr verdiyi xəbərə görə, "Nəqliyyatın intellektual sistemlə idarə oluması"nın layihələndirilməsi (layihələndirmə SK C&C Cənubi Koreya konsorsiumu tərəfindən aparılıb) başa çatdıqdan sonra sənədlər Azərbaycan dilinə tərcümə edilib və Danimarkanın TLBS şirkəti layihənin ekspertizasına başlayıb. Danimarka şirkəti təhlillərini apardıqdan sonra öz qeyd və təkliflərini irəli sürəcək. Layihənin son variantı isə sonra razılaşdırılacaq.
"Layihənin ilkin qiyməti 76 mln. dollar təşkil edir", - nəqliyyat nazirinin müavini Musa Pənahov bir müddət öncə deyib.
Seul şəhər Nəqliyyat Mərkəzinin analoqu olaraq inşa ediləcək Mərkəz SK C&C ilə Azərbaycan Nəqliyyat Nazirliyi arasında imzalanmış razılaşmaya əsaslanır. İlkin mərhələdə mərkəz Bakını əhatə edəcək, gələcəkdə isə bütünlükdə Abşeron yarımadasına siraət edəcək. Sonralar Nəqliyyat Mərkəzinin təsir dairəsi optik-tel kommunikasiya sisteminin hesabına Abşeron, Xırdalan, Sumqayıt və Gəncəni əhatə edəcək. Mərkəz şəhərdaxili və şəhərlərarası daşımalarla əlaqəli olacaq ki, bu da elektron bilet sisteminə keçiddə yardımçı olacaq.
Sözügedən sistemin tətbiqi nəticəsində işıqforların və avtobus dayanacaqlarının sayı təkmilləşdiriləcək. İşıqfor və dayanacaqların sayı körpülərin hesabına bir qədər azalıb. İntellektual idarə olunma sisteminin yaradılması avtonəqliyyat vasitələrinin hərəkəti, sürəti, dayanmaları, nəqliyyat qəzaları, tıxaclar və digər hadisələr barədə mərkəzi dispetçer məntəqəsinə operativ məlumat verməyə imkan yaradacaq.
Azərbaycanda Nəqliyyatın intellektual idarə olunması sisteminin yaradılması 3,5 ilə nəzərdə tutulub.
Məqalə müəllifi ilə əlaqə üynvanı: [email protected]
