Azərbaycan, Bakı, 01 aprel / Trend , müxbir N.İsmayılova /
Azərbaycanın Milli Bankı (AMB) tərəfindən elan edilmiş ödəmə balansına əsasən, 2008-ci ildə müsbət saldo 4,2 dəfə artaraq 12 milyard dollar təşkil edib ki, bu da ÜDM-nin 26,1 faizini təşkil edir. Bu barədə çərşənbə günü AMB-dən bildirilib.
Ödəmə balansında vəziyyətin yaxşılaşmasına əsas hissəsini neft-qaz strategiyası təşkil edən iqtisadi inkişafın sürətli artımına nail olunması üzrə strategiyanın həyata keçirilməsi, ixrac potensialının artırılması kimi faktorlar səbəb olub. Nəticədə isə ötən illərlə müqayisədə 2008-ci ildə daxili yığım norması investisiyanı artırıb, cari əməliyyatlar üzrə mənfi saldo böyük profisitlərlə dəyişdirilib.
Ötən ilin ödəmə balansının cari hesabı 16,5 milyard dollar profisitlə idi, bu isə 2007-ci ilin göstəricisindən 1,8 faiz (ÜDM-nin 35,6 faizi) çoxdur.
Ötən illərlə müqayisədə xarici ticarət üzrə müsbət saldo 1,5 dəfə artaraq, 23 milyard dollar (ÜDM-nin 49,7 faizi) təşkil edib. Kapital və maliyyə hərəkətləri hesabları üzrə mənfi saldonun maliyyələşdirilməsi nəticəsində ödəmə balansının ümumi saldosu müsbət olub.
Azərbaycanın xarici ticarət dövriyyəsinin ümumi həcmi 38,2 milyard dollar təşkil edib ki, bu da 2007-ci ilin göstəricisindən 39,7 faiz çoxdur. Bu zaman 7,6 milyard dollar dəyərində əmtəə idxalı, 30,6 milyard dollar dəyərində isə ixrac əməliyyatları həyata keçirilib.
Ötən il ərzində Azərbaycanın 140 ölkə ilə ticarət münasibətləri formalaşıb. Əmtəə dövriyyəsinin 10 faizi MDB ölkələrinin, 90 faizi isə digər xarici ölkələrin payına düşür. İtaliya, ABŞ, İsrail, Rusiya, Fransa, Türkiyə, Böyük Britaniya, Hindistan, İspaniya və Hollandiya ilə intensiv ticarət əlaqələri qurulub. Azərbaycanın ixrac-idxal əməliyyatlarının 72,3 faizi onların payına düşür.
Məqalə müəllifi ilə əlaqə ünvanı: [email protected]
