Azərbaycan, Bakı, 13 aprel / Trend , müxbir Ü.İsmayılova /
"Azərbaycanda Dünya bankı ilə birgə keçirilən "Daşınmaz əmlakın qeydiyyatı" layihəsi əsasında ölkə ərazisinin 40 min kvadrat kilometrini əhatə edən ortofoto xəritələr hazırlanıb və istifadəyə hazırdır", - Daşınmaz Əmlakın Dövlət Reyestri Xidmətinin rəhbəri Arif Qaraşov bazar ertəsi deyib. Azərbaycan ərazisinin ümumi sahəsi 86,6 kvadrat kilometr təşkil edir.
Ortofoto xəritələr tenderin qalibi Türkiyənin İNDES şirkəti tərəfindən hazırlanıb.
Qaraşovun sözlərinə əsasən, aprelin sonu və mayın əvvəllərində şirkət, Azəraycanın digər ərazilərinin xəritəyə salınması ilə bağlı işlərə başlayacaq. Hazırda şirkət ölkənin 80 faizinin kosmik çəkilişlərini tamalayıb.
"Hazırlanmış ortofoto xəritələr və kosmik çəkilişlər sıravi vətəndaşların ixtiyarına verilməyəcək. Məlumatlar məxfi olduğundan hökumət tərəfindən istifadə olunacaq", - Qaraşov qeyd edib.
"Sözügedən xəritə və çəkilişlərə əsasən, gələcəkdə ölkənin siyasi, turizm və digər xəritələri hazırlanacaq", - Qaraşov əlavə edib.
Azərbaycan hökuməti və Dünya bankı (DB) 2007-ci ilin iyul ayında daşınmaz əmlakın vahid kadastr sitemi barədə razılaşma imzalayıblar. Layihə 4 komponentdən ibarətdir - daşınmaz əmlakın qeydiyyatı; dövlət mülkiyyətinin reyestri və idarə olunması; baza kartoqrafiyası və torpaq kadastrı; treninqlər, siyasətin formalaşdırılması və layihənin idarə olunması. Layihənin dəyəri 38,57 milyon dollar təşkil edir ki, bunun 30 milyonu DB-nin payına düşür. Kredit resursları beş illik güzəştlə 20 il müddətinə ayrılıb.
Torpaq və Kartoqrafiya üzrə Dövlət Komitəsinə ümumi məbləğdən geodeziya, kartoqrafiya, ortofoto xəritələrin işlənməsi və torpaq kadastrı ehtiyaclarının ödənilməsi üçün 15 milyon dollar ayrılıb.
Məqalə müəllifi ilə əlaqə ünvanı: [email protected]