Azərbaycan, Bakı, 29 aprel / Trend , müxbir Ü.İsmayılova /
2008-ci ildə Azərbaycan Auditorlar Palatası 19 fiziki və 18 hüquqi şəxsə auditor fəaliyyəti göstərmək üçün icazə verib. Bu barədə çərşənbə günü palatadan bildirilib.
O cümlədən əvvəllər verilən lisenziyaların müddətinin başa çatması ilə əlaqədar olaraq 13 fiziki şəxsə və 8 auditor təşkilatına verilən lisenziyalar yenilənib.
2009-cu il 1 yanvar tarixinə olan vəziyyətə görə, Azərbaycanda 148 auditor - fiziki şəxs fəaliyyət göstərir, onların 41 nəfəri müstəqil auıditor kimi, 85 nəfər isə 50 auditor şirkətində fəaliyyət göstərir. Qalan 22 nəfər lisenziyalarının müvəqqəti olaraq dayandırılması üçün Auditorlar Palatasına müraciət ediblər.
2008-ci ildə Azərbaycan Auditorlar Palatasına 43 müstəqil auditorun, 57 auditor şirkətinin (o cümlədən dörd xarici şirkət və altı xarici iştirak payı ilə işləyən şirkət) hesabatı təqdim olunub.
Auditorlar Palatası, sədri ölkə parlamenti tərəfindən təsdiq olunmaqla, 1996-cı ildə təsis edilib.
Azərbaycan Auditorlar Palatası fəaliyyətinin əsas məqsədi qüvvədə olan qanunvericiliyə əsasən təsərrüfat subyektlərinin dəqiq maliyyə hesabatının təmin edilməsi məqsədi ilə auditor fəaliyyətinin inkişafıdır.
Məqalə müəllifi ilə əlaqə ünvanı: [email protected]
