Azərbaycan, Bakı, 08 may / Trend , müxbir N.İsmayılova /
Azərbaycan Vergilər Nazirliyinin operativ nəzarət tədbirləri nəticəsində vergi ödəyiciləri tərəfindən aprel ayı ərzində 2097 vergi qanunvericiliyi pozuntusu faktı aşkar edilib. Bu barədə cümə günü nazirlikdən deyiblər. Tədbirlər aprelin 1-dən mayın 3-dək davam edib.
Araşdırmalar aparılan müddətdə 902 vergi ödəyicisi nağd hesablaşma qaydalarını pozub, 124 xarici valyutanın hesablaşma vasitəsi kimi qəbul edilməsi faktı aşkar edilib. Keçirilən tədbirlər nəticəsində, 272 vergi ödəyicisinin vergi orqanlarında qeydiyyatı olmadan fəaliyyət göstərməsi və 487 vergi ödəyicisinin xüsusi icazə tələb edən sahədə qeyri-qanuni fəaliyyəti faktı üzə çıxarılıb.
Operativ nəzarət tədbirləri zamanı 6 vergi ödəyicisində 64 fiziki şəxsin əmək müqaviləsi olmadan işə cəlb edilməsi qeydə alınıb. 88 vergi ödəyicisinin fərqləndirmə nişanı olmadığı halda sərnişin daşımaları həyata keçirməsi, 147 şəxsin ictimai yerlərdə valyuta alqı-satqısı keçirdikləri aşkar edilib.
Aksiz markalarının istifadə olunmasına nəzarət məqsədilə 13 vergi ödəyicisində müvafiq marka olmayan 5179,5 manat dəyərində 1091 məhsul qeydə alınıb.
Mayın 08-nə olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]
