Azərbaycan, Bakı, 14 may / Trend , müxbir E.İsmayılov /
MDB ölkələri Dəmiryol Nəqliyyatı Şurasının iclası mayın 21-22-də Minskdə keçiriləcək. Bu barədə Azərbaycan Dövlət Dəmir Yolu İdarəsi (ADDY) mətbuat xidmətinin başçısı Nadir Azməmmədov cümə axşamı deyib.
"ADDY sözügedən iclasda iştirak edəcək. Lakin tədbirin gündəliyində duran məsələlər barədə məlumatımız hələki yoxdur", - Azməmmədov deyib.
Onun sözlərinə görə, iclasda Azərbaycanı Dövlət Dəmir Yolunun rəhbəri Arif Əsgərovun başçılıq etdiyi nümayəndə heyyəti təmsil edəcək.
MDB üzv-ölkələrinin Dəmiryolu Şurası və onun daimi fəaliyyətdə olan icra orqanı (Şura müdiriyyəti) sabit iqtisadi əldaqələrin yaradılması, möhkəmləndirilməsi və inkişafı məqsədilə MDB ölkələri başçıları tərəfindən 1992-ci il fevralın 14-də əldə edilmiş razılaşmaya əsasən yaradılıb.
Şura üzvləri MDB ölkələrinin Dəmir Yolu Administrasiyalarından ibarətdir. Şuranın işində Latviya və Bolqarıstan Dəmir Yolu Administrasiyaları assosiasiya olunmuş üzv kimi, Litva və Estoniya isə razılaşma əsasında iştirak edirlər.
Şura dəmir yollarının istismar fəaliyyəti, yük qatarlarının birgə istifadəsi və texniki tərkibi, beynəlxalq nəqliyyatda qatarların təhlükəsiz hərəkətinin təmin olunması, elmi-texniki əməkdaşlıq və digər məsələlərin müzakirəsini aparır.
Məqalə müəllifi ilə əlaqə ünvanı: [email protected]