Azərbaycan, Bakı, 16 may / Trend , müxbir Ü.İsmayılova /
MDB ölkələrinin gömrük xidmətlərinin hüquq-mühafizə departamentləri rəhbərlərinin üçüncü iclası 2010-cu ildə Ukraynada keçiriləcək. Bu qərar gömrük xidməti rəhbərləri şurasının bu həftə Bakıda keçirilən ikinci iclası zamanı qəbul olunub.
İkinci iclas zamanı tərəflər gündəliyə daxil edilən 15 məsələni müzakirə edib. İclasda Belarusiya, Qazaxıstan, Qırğızıstan, Ukrayna, Özbəkistan, Tacikistan, Rusiya və Moldovanın gömrük xidməti rəhbərləri iştirak ediblər.
2008-ci ildə Azərbaycanda təqribən dörd min inzibati qanun pozuntusu faktı qeydə alınıb ki, bunun da 160-ı cinayət xarakteri daşıyıb. İclas zamanı komitənin hüquq pozuntuları şöbəsinin rəhbəri Güloğlan Muradlı bildirib ki, Dövlət Gömrük Komitəsi əməkdaşlarının gördüyü tədbirlər zamanı narkotik maddələrinin qanunsuz dövriyyəsi (356 kiloqram) ilə bağlı 64 faktın qarşısı alınıb ki, bu da 2006-cı ildə qeydə alınan göstəricidən 25 dəfə çoxdur.
Məqalə müəllifi ilə əlaqə ünvanı: [email protected]