Azərbaycan, Bakı, 18 may / Trend , müxbir N.İsmayılova /
"Avropa Yenidənqurma və İnkişaf Bankı (AYİB) Azərbaycanın bankı Bank of Baku ilə birgə 2008-ci ildə "Irshad Telecom" şirkətinə 0,8 milyon avro sərmayə qoyub", - AYİB-in ötən il üçün hesabatında deyilir.
Kredit "Irshad Telecom" şirkətinin Azərbaycandakı mobil telefon mağazaları şəbəkəsinin genişləndirilməsi məqsədi ilə verilib.
"Mobil rabitənin infrastrukturunun və xidmətlərinin qurulması regional inkişafın əsas çıxış nöqtəsidir", - hesabatda deyilib.
[Irshad Telecom işinə 2000-ci ildə I&R şirkəti kimi başlayıb. Onun adı 2007-ci ilin sonunda dəyişdirilib. Hazırda beş əsas və dörd diler mağazası var.]
2008-ci ildə AYİB Rusiyanıın "MTS" şirkətinə onun bütün Rusiya və Özbəkistan üzrə şəbəkəsinin genişləndirilməsinə yardım etmək, eləcə də Türkmənistanda mövcud olan şəbəkələri təkmilləşdirmək üçün 115 milyon avro ayırıb. AYİB əməliyyat ölkələrində mobil rabitənin inkişafına hərtərəfli yardım edir.
2008-ci ildə AYİB-in əsas istiqamətlərindən biri rabitənin regional inkişafı olub. Xüsusilə Gürcüstandakı "Kavkaz Onlayn" şirkətinə verilən 26,2 milyon avroluq kredit, Gürcüstan və Bolqarıstan arasında böyük həcmli sualtı optik-lifli kabelin salınmasını başa çatdırmaq imkanı verib. Gürcüstanın Azərbaycan və Ermənistanla birləşdirən rabitə əlaqələri hesabına bu kabel, Qafqaz və Mərkəzi Asiyadakı rabitə operatorlarına Qərbi Avropaya rahat məlumat axınını təmin etmək imkanı verəcək.
2008-ci ildə AYİB rabitə, KİV və texnologiyalar layihələrinə 235 milyon avro sərmayə qoyub, o cümlədən əlavə 210 milyon avro digər beynəlxalq maliyyə təşkilatları və kommersiya bankları ilə birlikdə yenidən maliyyələşdirmə hesabına cəlb edilib. İnformasiya və kommunikasiya texnologiyalarının inkişafına vəsait qoymaqla AYİB keçid iqtisadiyyatına malik ölkələrə öz istehsalını innovasiya və rəqabəti stimullaşdırmaqla diversifikasiya etməyə kömək edir.
2008-ci ildə Bank Azərbaycana 81 milyon avro, 2007-ci ildə isə 122 milyon avro yatırıb.
Məqalə müəllifi ilə əlaqə ünvanı: [email protected]
