Azərbaycan, Bakı, 19 may / Trend , müxbir N.İsmayılova /
"Mayın 20-21-də Bakı şəhərində İqtisadi Əməkdaşlıq Təşkilatına (İƏT) üzv dövlətlərin özəlləşdirmə və özəl sektorun inkişafı üzrə yüksəksəviyyəli ekspertlər qrupunun 3-cü və İƏT üzv dövlətlərin özəlləşdirmə qurumları rəhbərlərinin 4-cü iclasları keçiriləcək", - Dövlət Əmlakının İdarə Edilməsi üzrə Dövlət Komitəsinin məlumatında deyilir.
Azərbaycan dövləti tərəfindən təmsilçilik və təşkilatçılığı Dövlət Əmlakının İdarə Edilməsi üzrə Dövlət Komitəsi həyata keçirəcək. Tədbirdə İqtisadi Əməkdaşlıq Təşkilatını qurumun Baş katibinin başcılıq etdiyi nümayəndə heyəti təmsil edəcək. Həmçinin iclasda 9 dövlətin, o cümlədən Türkiyə, İran, Əfqanıstan, Qazaxıstan, Qırğızıstan, Pakistan, Tacikistan, Türkmənistan və Özbəkistanın özəlləşdirmə qürümlarının rəhbərlərinin başçılıq etdiyi nümayəndə heyətləri iştirak edəcək.
Mayın 20-də İƏT üzv dövlətlərin özəlləşdirmə və özəl sektorun inkişafı üzrə yüksək səviyyəli ekspertlər qrupunun 3-cü iclası keçiriləcək. İclasda müvafiq dövlətlərin nümayəndələri tərəfindən ölkələr üzrə təqdimat, İƏT katibliyi tərəfindən özəlləşdirmə üzrə Fəaliyyəti Planının yerinə yetirilməsi barədə məlumatlar veriləcək və müzakirələr aparılacaq.
Mayın 21-də İqtisadi Əməkdaşlıq Təşkilatına üzv dövlətlərin özəlləşdirmə qurumları rəhbərlərinin 4-cü iclası keçiriləcək. Tədbirdə ölkələr üzrə nümayəndə heyətlərinin başçılarının məlumatı dinləniləcək. Həmçinin özəlləşdirmə və özəl sektorun inkişafı üzrə Yüksək səviyyəli Ekspertlər Qrupunun 3-cü iclasının Hesabatı müzakirə ediləcək. Eyni zamanda, iclas çərçivəsində İƏT Katibliyi tərəfindən Özəlləşdirmə üzrə Fəaliyyət Planının yerinə yetirilməsinə dair görülən işlər barədə məruzə ediləcək və müzakirələr aparılacaq. Tədbir çərçivəsində İƏT özəlləşdirmə saytının yaradılması ilə bağlı görülən işlər də müzakirə ediləcək, saytın təqdimatı keçiriləcək. İclasda İƏT üzv dövlətlərinin "Bakı Bəyannaməsi" qəbul ediləcək.
Məqalə müəllifi ilə əlaqə ünvanı: [email protected]
