Azərbaycan, Bakı, 19 may / Trend , müxbir İ.Xəlilova /
"Dünya Bankı (DB) bu həftə Hacıqabul-Bəhramtəpə avtomobil yolunun yenidənqurması üzrə rəsmi danışıqlara başlayır. Bank onun realizəsinə 2009-cu maliyyə ilində 63 milyon dollar həcmində güzəştli kredit ayıracaq", - çərşənbə axşamı DB-nin Bakı nümayəndəliyindən deyilib.
116 kilometrlik yolun tikintisinə DB 175 milyon dollar ayırmağı planlaşdırır. Müvafiq olaraq 112 milyon dollar Beynəlxalq Yenidenqurma və İnkişaf Bankının (BYİB) vəsaitləri hesabına maliyyələşdiriləcək.
Bir müddət əvvəl güzəştli krediti Bakı-Şamaxı-Muğan avtomobil yolunun ikizolaqlılıqdan dördzolaqlılığa çevrilməsinə yönəltmək planlaşdırılırdı. Ancaq beynəlxalq standartların tələblərinə əsasən, ekoloji qiymətləndirmə üçün 120 gün ictimai müzakirə tələb olunduğundan, bu prosedurların iyunun sonuna qədər başa çatdırılmasının mümkün olmadığı ortaya çıxır. [Güzəştli kreditlər 2009-cu maliyyə ili üçün nəzərdə tutulub ki, o da iyunun 30-da başa çatır]. Bununla yanaşı, Hacıqabul-Bəhramtəpə yolunun təmiri nəzərdə tutulur.
"Maliyyələşmənin güzəştli hissəsini itirməmək üçün onu Hacıqabul-Bəhramtəpə yolunun yenidənqurmasına yönəltmək qərarı qəbul edilib. Bu layihə torpaqların alınması, yolun kənarında yaşayan əhalinin köçürülməsi kimi prosedurları tələb etmir", - nümayəndəlikdən deyilib.
İkizolaqlı yolun tikintisini nəzərdə tutan layihənin ümumi dəyəri 200 milyon dollardır.
Bununla yanaşı, Bakı-Şamaxı-Muğan avtomobil yolunun tikintisi layihəsi üzrə işlər davam etdirilir.
Yolun uzunluğu 124 kilometrdir. Təsdiq edilmiş layihəyə əsasən, onun tikintisi $90,11 mln. qiymətləndirilir. $72,09 mln. məbləğdə tikinti işlərini DB maliyyələşdirəcək, $18,02 mln. isə Azərbaycan tərəfi ayıracaq. Nazirlikdə layihənin bahalaşması ilə bağlı yeni hesablamalar (yolun ikizolaqlılıqdan dördzolaqlılığa keçirilməsi) aparılıb, lakin hələlik açıqlanmır.
Tikinti işlərinin görülməsi üçün baş podratçı İtaliyanın "Todini Costruzioni Generali S.p.A" şirkəti seçilib. Finlandiyanın "Finroad" şirkəti layihənin məsləhətçisi qismində çıxış edir.
Layihə çərçivəsində Tovuz dairəvi yolunun tikintisi nəzərdə tutulur ki, hazırda bununla əlaqədar ərazidə yaşayan insanlardan torpaqların alınması üzrə işlər aparılır. Yolun uzunluğu 7,2 kilometrdir.
Bakı-Şamaxı-Muğan yolu Bakını respublikanın qərb rayonları ilə bağlayacaq. Layihənin əsas məqsədi nəqliyyat xərclərinin azaldılması və çıxışın, tranzitin artırılması, Şərq-Qərb Azərbaycan dəhlizləri üzrə keçid üçün yol təhlükəsizliyinin təmin edilməsidir.
Bu yol layihəsi DB Direktorlar Şurasında 2006-cı il yanvarın 17-də təsdiqlənib. Kredit ehtiyatları BYİB-nin şərtləri ilə ayrılıb: 4 il güzəştli dövr olmaqla 20 il müddətinə və illik libor+0,5 faiz dərəcə ilə. Ancaq əlavə maliyyələşdirməni güzəştli şərtlər daxilində təqdim etmək planlaşdırılır: 10 il güzəştli dövrlə 35 il müddətinə və illik 0,75 faiz dərəcəsi ilə.
Məqalə müəllifi ilə əlaqə ünvanı: [email protected]
