Azərbaycan, Bakı, 25 may / Trend , müxbir Ü.İsmayılova/
"Apreldə Bakının ilkin mənzil bazarında marta nisbətən 1,9 faiz azalma müşahidə olunub. Martda bir kvadratmetrin qiyməti 1006 dollar idisə, apreldə bu rəqəm 987 dollara bərabər olub", - "Əmlak bazarı iştirakçıları" İctimai Birliyinin bazar ertəsi yayılmış məlumatında deyilir.
Bakıdakı yeni tikililərin orta sahəsi apreldə 0,4 faiz artaraq 121,7 kvadratmetrə çatıb. Blokların orta göstəricisi 2,2-dən 2,4-ə qədər artıb, orta mərtəbə göstəricisi 15,1 təşkil edib.
Ötən ay ərzində 454 tikinti şirkəti tərəfindən 178 binanın tikintisi davam etdirilib ki, mart ayında bu rəqəm 189 şirkət və 461 binaya bərabər olub. Ötən ay ərzində 10 binanın tikintisi və mənzillərin satışı başa çatdırılıb və üç bina bazara yenicə daxil olub.
Apreldə yeni tikililərin əksəriyyəti Bakının Xətai, Nəsimi və Yasamal rayonlarında tikilməkdə davam edib. Onlar ilkin mənzil bazarının ümumi portfelinin 62,3 faizini təşkil edib.
Məqalə müəllifi ilə əlaqə ünvanı: [email protected]
