Azərbaycan, Bakı, 30 iyun / Trend , müxbir İ.Xəlilova /
İslam İnkişaf Bankı (İİB) Azərbaycan hökumətinə 2010-2012-ci illəri əhatə edən yeni əməkdaşlıq proqramının hazırlığına başlamağı təklif edib. Bu barədə bankın Azərbaycan üzrə sədri Tamerlan Tağıyev məlumat verib.
"Yeni proqramın hazırlanması layihələrə yenidən baxılması ilə əlaqədardır. 2010-cu ilin iyununda Bakıda keçiriləcək İİB idarəetmə heyətinin investisiya konfransında 35-ci iclas çərçivəsində layihələrin siyahısı müzakirə olunacaq", - deyə Tağıyev bildirib.
Konfransda İslam Bankının bütün strukturlarının rəhbərlərinin, 55 üzv ölkənin (Azərbaycan 56-cı olmaqla) investorlarının iştirakı gözlənilir.
Tağıyevin sözlərinə görə, bank proqramın hazırlığına başlamaq üçün Azərbaycana diplomatik heyət göndərməyə hazırdır.
"İİB Azərbaycanın energetika, su təchizatı və irriqasiya, avtomobil yollarının tikilməsi, qaçqınların və məcburi köçkünlərin həyat səviyyəsinin yaxşılaşdırılması ilə bağlı layihələrin maliyyələşdirilməsinə üstünlük verir", - Tağıyev deyib.
İİB Azərbaycana layihələrin maliyyələşdirilməsi üçün 280 milyon dollar vəsait ayırıb.
Azərbaycan 1991-ci ildən İslam Bankının üzvüdür. Üzv ölkələrin bankdakı kapitalı 0,13 faiz təşkil edir. Bununla yanaşı, layihələrin maliyyələşdirilməsi dövlətin zəmanəti altındadır. Artıq bankın struktur bölmələri, İslam İnişaf Korporasiyasının özəl sektorları Azərbaycanın layihələrini dəstəklədiklərini bəyan ediblər. Kommersiya bankları vasitəsilə maliyyələşdirmənin genişləndirilməsi ilə yanaşı, korporasiya yerli şirkətləri dəstəkləməyə də hazırdır.
Eyni zamanda, korporasiyanın Xəzər Beynəlxalq İnvestisiya Şirkəti, İCD idarələrinin Azərbaycanın İnvestisiya Şirkətləri ilə birgə ölkədə özəl sektoru maliyyələşdirməsi imkanları da var.
İslam İnkişaf Bankı 1975-ci ildə yaradılıb. Bankın kapitalı əsası qoyulandan bu günə kimi 15 dəfə artırılaraq 2 milyard islam dinarından 30 milyard dinara qədər çatıb. (İslam dinarı İİB-nın yeganə valyutasıdır və Beynəlxalq Valyuta Fondundan alınmış xüsusi ekvivalentlik hüququna malikdir).
Məqalə müəllifi ilə əlaqə ünvanı: [email protected]
