Azərbaycan, Bakı, 01 avqust / Trend , müxbir N.İsmayılova /
Mərkəzi Bank yanında fəəaliyyət göstərən Azərbaycan İpoteka Fondu (AİF) tərəfindən iki ay ərzində 400-dən çox ipoteka krediti verilib. Bu barədə şənbə günü fonddan deyilib.
"Maliyyələşmənin ümumi həcmi 17 milyon manatı ötüb. İyul ərzində 16 milyon manatdan çox məbləğdə ipoteka krediti verilib", - fonddan deyilib.
Kredit səlahiyyətli təşkilatlar bu günə adi ipoteka kreditlərinin alınması üçün 1200-dən çox, güzəştli ipoteka kreditlərinin alınması üçün isə150 müraciət alıblar. Daxil olan ərizələr üzrə kreditlərin ümumi həcmi 51 milyon manatdan çoxdur. Bunun təxminən 5 milyon manatı güzəştli ipoteka kreditlərinin alınması üçün edilən müracitələrin payına düşür.
Azərbaycanda verilən adi ipoteka kreditinin maksimal məbləği 50 min manatdır. Belə kreditlər 8 faizlə 25 il müddətinə verilir. Sosial ipotekanın ən yüksək məbləği isə 35 min manatdır və 4 faizlə 30 il müddətinə verilir. Adi və güzəştli kreditlər üçün ilkin ödəmə 15 faizdir.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir; ipotekanın obyekti yalnız mənzil və şəxsi ev ola bilər; ipoteka kreditləşməsinin məbləği bazar qiymətlərinin 85 faizini keçməməlidir; kredit üzrə aylıq ödəmə borc götürənin aylıq gəlirinin 70 faizini keçməməlidir; həyat və s. sığortalar üzrə müqavilə olmalıdır.
Güzəştli şərtlərlə kredit şəhid ailələrinin üzvlərinə, milli qəhrəmanların ailə üzvlərinə, məcburi köçkünlərə, 3 ildən çox iş təcrübəsi olan dövlət qulluqçularına, elmlər namizədi və doktorluq dərəcəsi olanlara, idman sahəsində xidməti olan şəxslərə, eləcə də minimum xidmət müddəti üç il olan hərbçilərə verilir.
Hər ailənin bir dəfə güzəştli ipoteka krediti almaq hüququ var.
Fondun kredit səlahiyyətli təşkilatları 17 bankdır. 2009-cu il üçün dövlət büdcəsində banklar vasitəsilə sosial ipotekanın maliyyələşdirilməsi üçün 14 milyon manat nəzərdə tutulub.
2005-2009-cu illərdə AİF vasitəsilə ipotekanın maliyyələşdirilməsi üçün Azərbaycanın dövlət büdcəsindən 94 milyon manatın ayrılması nəzərdə tutulub. Banklar vasitəsilə bunun 75,8 milyon manatdan çoxu verilib. Bundan əlavə, fond bazara hər birinin nominal dəyəri 1000 manat olan 55 min istiqraz buraxıb. Emissiya məbləğinin həcmi 55 milyon manat təşkil edir ki, bunun da 25 milyon manatı artıq paylanılıb. Bu emissiyaların tam yerləşdirilməsi təxminən 1100 ipoteka kreditinin verilməsinə imkan yaradacaq.
Avqustun 01-nə olan rəsmi məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]
