Qazaxıstan, Astana, 03 avqust / Trend , müxbir K.Konırova /
Bazar ertəsi Qazaxıstanın Alma-Ata vilayətinin Jetıqen kəndində Prezident Nursultan Nazarbayevin iştirakı ilə yeni Korqas-Jetıqen dəmiryol xəttinin ilk rels-şpal torunun qurulmasının təntənəli mərasimi baş tutub. Bu barədə Trend -ın xüsusi müxbirinə Nəqliyyat və Kommunikasiya Nazirliyinin mətbuat xidmətindən məlumat verilib.
"298,4 kilometr uzunluğu olan bu sahə Çinlə ikinci beynəlxalq keçid olacaq. Tikinti ölkə iqtisadiyyatının nəqliyyat sektorunun rəqabət qabiliyyətliliyinin yüksəldilməsinə yardımçı olacaq", - qurumun mətbuat xidmətindən deyilib.
Bir müddət əvvəl məlumat verilib ki, çin-qazax nəqliyyat dəhlizinin yeni istiqaməti kimi yeni hissə Çin və Cənub-Şərqi Asiya ölkələrinin Qazaxıstan, Mərkəzi Asiya ölkələri və Avrasiya materiki ilə nəqliyyat əlaqələrinin inkişafı və genişləndirilməsinə kömək edir.
"Bununla yanaşı, Çin ilə Qazaxıstanın cənub regionları və Mərkəzi Asiya arasındakı məsafə 500 km azalacaq", - nazirlikdən qeyd olunub.
Mətbuat xidmətinin məlumatına görə, Korqas-Jetıqen dəmiryol hissəsinin istismara verilməsi yükdaşıma baxımından ağır olan Dostık-Aktoqay hissəsindəki işin yüngülləşməsinə və Çinlə sərhəddə buraxılış gücünün ildə 35-40 milyon tona qədər artırılmasına imkan verəcək. İlk istismar ilində yeni dəmiryol xətti ilə daşınmanın həcminin 5,5 milyon ton yükə çatdırılması planlaşdırılır.
Bununla yanaşı, Korqas-Jetıqen xəttinin əhalinin sıx məskunlaşdığı rayonlardan keçməsini nəzərə alaraq, dəmiryolunun tikintisi və sonrakı istismarı əhaliyə nəqliyyat xidmətinin səviyyəsini yüksəldəcək və çoxsaylı sosial məsələləri həll etmək imkanı verəcək. Sadəcə tikinti dövründə 5500-dən çox, istismar zamanı isə 2500 işçi cəlb olunacaq. Beləliklə, yol həm bilavasitə dəmiryol, həm də yeni iş yerlərinin yaradılmasına imkan verəcək.
"Yeni hissənin istismara verilməsi 2012-ci ilə planlaşdırılıb", - nazirlikdən qeyd edilib.
Məqalə müəllifi ilə əlaqə ünvanı: [email protected]