Azərbaycan, Bakı, 12 avqsut / Trend , müxbir N.İsmayılova /
"Aqrolizinq" ASC aqroservis filiallarında təmir işləri və Azərbaycanın bir sıra regionunda üç lot üzrə gübrələmə üçün logistik bazaların inşası üzrə açıq tender elan edib. Bu barədə şirkətin məlumatında deyilir.
Birinci lot üzrə Zaqatala, Ağdaş, İsmayıllı və Xaçmazda aqroservis filiallarında əsaslı təmir və tikinti-montaj işlərinin aparılması nəzərdə tutulub. Bu lot üzrə tenderdə qalib gələn namizədlər müqavilənin imzalanmasından etibarən 90 gün ərzində işləri yekunlaşdırmalıdırlar.
İkinci və üçüncü lot üzrə Şəmkir və Xaçmaz rayonlarında gübrələnmə üçün logistik bazaların inşası nəzərdə tutulub. Bu lotlar üzrə tenderdə qalib gələn namizədlər müqavilənin imzalanmasından etibarən 180 gün müddətində inşa işlərini başa çatdırmalıdırlar.
Tenderdə iştirak etmək üçün namizədlər öz sənədlərini (tender təklifi və tender təklifinin dəyərinin 2 faizi ölçüsündə bank zəmanətindən başqa) bu il sentyabrın 3-nə, təkliflərini isə sentyabrın 10-dək təqdim etməlidirlər.
Tender təklifləri sentyabrın 18-də "Aqrolizinq"də namizədlərin və ya onların səlahiyyətli nümayəndələrinin iştirakı ilə açılacaq.
"Aqrolizinq" ASC-nin xüsusi investisiya proqramına əsasən, 2008-2015-ci illərdə müasir avadanlıqlarla təchiz edilmiş təmir emalatxanalarının inşası, 20 rayonda aqroservis filiallarının maddi-texniki bazasının yaxşılaşdırılması, Gəncə və Xaçmazda təminat bazalarının bərpası, İmişli və Cəlilabadda 10-15 min ton tutumlu gübrələmə üçün iki logistik bazanın inşası planlaşdırılır.
"Aqrolizinq" ASC Kənd Təsərrüfatı Nazirliyinin balansındadır. Hazırda ASC-nin 9 regional aqroservis təchizat bazası və işğal olunmuş ərazilər istisna olmaqla, Azərbaycanın bütün rayonlarında 50-dən çox aqroservis filialı var.
2005-ci ildən 2008-ci ilədək "Aqrolizinq" dövlət büdcəsindən 133 milyon manat alıb. Bu məbləğdən 76,6 milyon manat kənd təsərrüfatı texnikasının alınmasına, 7,4 milyon manat texnoloji təchizata, 4,9 milyon manat isə pestisidlərə və gübrələnməyə sərf edilib.
Bu dövr ərzində 500-dən çox taxılyığan maşın, 1,5 min traktor, 30 min traktor, 120 ekskavator, dörd mindən çox müxtəlif adda kənd təsərrüfatı texnikası alınıb.
2009-cu ildə dövlət büdcəsindən "Aqrolizinq" ASC üçün əvvəlki illərdə olduğu kimi 37,5 milyon manat ayrılıb.
Avqustun 12-nə olan cari məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]