Azərbaycan, Bakı, 19 avqust / Trend , müxbir İ.Хəlilova /
"2009-cu il avqustun 24-də Bakı Fond Birjasında Azərbaycan İpoteka Fondunun (AİF) faizli, adlı, sənədsiz və təmin edilmiş istiqrazlarının növbəti yerləşdirilməsinin həyata keçiriləcəyi və hərraca 5 000 000 AZN həcmində istiqraz çıxarılacağı elan edilib", - çərşənbə günü fonddan deyilib.
"İstiqrazlar cari qiymətlə (100,5750) satışa çıxarılacaq. İstiqrazları əldə etmək istəyən şəxslər "Bakı Fond Birjası" QSC-nin üzvü olan və broker lisenziyasına malik olan təşkilatlara müraciət edə bilərlər", - AİF-dən bildirilib.
Emissiyanın ümumi həcmi 55 000 000 AZN təşkil edir, bir istiqrazın nominal dəyəri 1 000 AZN-dir. Bu istiqrazların yerləşdirilməsinə bu il iyunun 16-da başlanılıb və hərraclarda bu günədək 25 000 000 AZN həcmində istiqraz yerləşdirilib.
İstiqraz üzrə gəlirlilik 3 faiz təşkil edir. İstiqrazların ödənmə tarixi 10 may 2016-cı ildir.
Təqdim edilmiş sifarişlər təklifdən çox olduğu halda sifarişlər proporsional qaydada təmin ediləcək. İstiqrazların ilkin yerləşdirilməsində iştirak edən təşkilat Azərbaycan Mərkəzi Bankıdır.
Qiymətli Kağızlar üzrə Dövlət Komitəsi tərəfindən AİF-in faizli, adlı və sənədsiz istiqrazlarının emissiya prospekti 2009-cu il mayın 29-da qeydə alınıb.
Avqustun 19-na olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
