Azərbaycan, Bakı, 20 avqust / Trend /
Avropa İttifaqının (Aİ) dəstəyi ilə Azərbaycanın Sumqayıt şəhərinin pasportu və investisiya proqramı hazırlanır. Bu barədə cümə axşamı Sumqayıt Şəhər İcra Hakimiyyətindən yayılan məlumatda deyilir.
"Şəhərin pasportunun və proqramının hazırlanması prosesi cümə axşamı Sumqayıt Şəhər İcra Hakimiyyətinin nümayəndələri və Avropa Birliyinin İqtisadi İnkişaf Nazirliyinə Dəstək Layihəsinin mütəxəssisləri ilə görüşdə müzakirə olunub", - məlumatda deyilir.
Görüşdə Abşeron iqtisadi rayonu üzərində işləyən Avropa Birliyinin regional inkişaf üzrə eksperti Con Teyt də iştirak edib.
Sumqayıt şəhərinin pasportunun və investisiya proqramının hazırlanması üçün artıq Şəhər İcra Hakimiyyətinin və aidiyyatı təşkilatların nümayəndələrindən ibarət işçi qrupu təşkil olunub. İşçi qrupunun gündəliyində duran əsas məsələlər sənaye, energetika və ekologiya sahələri üzrə lazımi məlumatların toplanması və təhlilidir. Teytin sözlərinə görə, sahəvi məlumatlar toplandıqdan sonra Sumqayıt şəhərinin perspektiv layihələrini özündə əks etdirən strateji inkişaf planı və şəhərin pasportu hazırlanacaq.
