Azərbaycan, Bakı, 24 avqust / Trend , müxbir A.Bədəlova /
Bir sıra ölkələrin, xüsusilə də Avropa İttifaqının böyük ölkələrinin - Almaniya və Fransanın iqtisadiyyatı ikinci rübdə yüksək artım nümayiş etdirdi. İtaliya və İspaniya kimi digər ölkələrdə isə işgüzar fəallığın azalması müşahidə edildi. Ümumilikdə ikinci rüb ərzində regionun iqtisadiyyatı 0,1 faiz səviyyəsində mənfi artım nümayiş etdirdi. Bu göstərici gözləniləndən yaxşı oldu. Birinci rübdə regionun iqtisadi azalması 2,5 faiz təşkil edib.
ABŞ-ın Morgan Stanley investisiya bankının analitiklərinin məruzəsində deyildiyi kimi, ÜDM-in artımına təsir göstərən bir neçə amil mövcuddur ki, bunların sırasına istehlak xərcləri, həmçinin qeyri-adi soyuq qışdan sonra bərpa edilən tikinti və hökumətin infrastuktur xərcləri daxildir.
Bankın analitiklərinin fikrincə, qısamüddətli perspektivdə Avropa zonası iqtisadiyyatının gələcək inkişafı üçün şans var. "Bununla yanaşı, cari makroiqtisadi göstəricilər region üzrə proqnozumuzu dəyişməyə imkan vermir", - məruzədə deyilir.
ABŞ bankının analitiklərinin proqnozlarına əsasən, Avropa zonası iqtisadiyyatının enməsi bu il onlar tərəfindən əvvəlcə proqnozlaşdırılan 4,4 faizə nisbətdə dörd faiz təşkil edəcək.
2010-cu ildə region iqtisadiyyatının artım proqnozları qismən - 0,5 faizdən 0,6 faizə dəyişilib.
Britaniyanın iqtisadi tədqiqatlar üzrə aparıcı konsaltinq şirkəti Capital Economics hesab edir ki, pisləşən iqtisadi böhran artıq geridə qalıb.
"Bununla yanaşı, ixracın əhəmiyyətli dərəcədə artım perspektivinə inamın elə də çox olmaması və hələ də zəif daxili tələbat iqtisadiyyatın V şəkilli bərpasını istisna edir", - Avropa üzrə iqtisadçı Ben Mey hesab edir.
Britaniya şirkətinin analitiklərinin proqnozlarına görə, Avropa zonası iqtisadiyyatının artımı 0,5 faiz təşkil edəcək. Bu ilin yekunlarına əsasən, region iqtisadiyyatının enməsi analitiklər tərəfindən əvvəlcədən proqnozlaşdırılan beş faizə nisbətdə dörd faiz təşkil edəcək.
Məqalə müəllifi ilə əlaqə ünvanı: [email protected]
