Azərbaycan bankı Royal Bank İpoteka Fondu xətti ilə 22 ipoteka krediti maliyyələşdirib
Azərbaycan, Bakı, 01 sentyabr / Trend , müxbir N.İsmayılova /
Azərbaycan bankı Royal Bank iyun 11-dən Mərkəzi Bank yanında fəaliyyət göstərən Azərbaycan İpoteka Fondu xətti ilə 22 ipoteka krediti verib. Bu barədə çəşənbə axşamı bankdan bildirilib.
"Bank kreditləşməyə iyunda başlayıb və bu günədək artıq 1,3 milyon manat məbləğində 22 kredit verib", - bankdan deyilib.
Bankdan həmçinin qeyd edilib ki, bu günədək banka ümumilikdə 87 ərizə daxil olub.
Paralel olaraq bank xüsusi ipoteka proqramı çərçivəsində maliyyələşməni də davam etdirir.
İpoteka kreditinin bərpası ilə əlaqədar olaraq 17 bank, 9 qiymətləndirmə və 13 sığorta şirkəti AİF-in səlahiyyətlisi təsdiq olunub.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir; ipotekanın obyekti yalnız mənzil və şəxsi ev ola bilər; ipoteka kreditləşməsinin məbləği bazar qiymətlərinin 85 faizini keçməməlidir; kredit üzrə aylıq ödəmə borc götürənin aylıq gəlirinin 70 faizini keçməməlidir; həyat sığortasının məbləği ipoteka kreditindən çox olmalıdır və s.
Güzəştli şərtlərlə kredit şəhid ailələrinin üzvlərinə, milli qəhrəmanların ailə üzvlərinə, məcburi köçkünlərə, 3 ildən çox iş təcrübəsi olan dövlət qulluqçularına, elmləri namizədi və doktorluq dərəcəsi olanlara, idman sahəsində xidməti olan şəxslərə, eləcə də minimum xidmət müddəti üç il olan hərbçilərə verilir.
Hər ailənin bir dəfə güzəştli ipoteka krediti almaq hüququ var.
2005-2008-ci illərdə AİF vasitəsilə ipotekanın maliyyələşdirilməsi üçün Azərbaycanın dövlət büdcəsindən 94 milyon manat ayrılması nəzərdə tutulub. Onlardan banklar vasitəsilə 70 milyon manatdan çoxu artıq verilib.
2009-cu il üçün dövlət büdcəsində sosial ipotekanın maliyyələşdirilməsi üçün 14 milyon manat nəzərdə tutulub. Bundan əlavə, AİF 55 milyon manatlıq istiqrazlar buraxıb. Bunun 30 milyon manatı artıq yerləşdirilib.
Sentyabrın 01-nə olan cari məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]
